KUALA LUMPUR: Perintah Sarawak meda pekara pelajar nyadi batang pekara ti patut dikemeratka.
Sapit Menteri Besai Dato Sri Fadillah Yusof madah, ketegal nya, perintah nengeri udah numbuhka Opis Menteri Pelajar, Inovasyen Enggau Pemansang Pengelandik Sarawak (MEITD) Ke nyadi jematan begulai enggau Opis Menteri Pelajar Malaysia (KPM) ngatur isu pelajar ke bisi nyadi di Sarawak.
"Nya alai, ba renggat nengeri, Perintah Sarawak udah numbuhka MEITD ti nyaup ngatur isu pelajar di Sarawak.
"Isu ke besai ti patut diputar Perintah Besai enggau Perintah Sarawak iya nya isu suntuk pengajar enggau isu perengkaguna ba sekula kelalu lama tauka sekula repuk.
"Ketegal nya, pekara pelajar besai amat ba kitai lalu nyadi batang pekara ba Sempekat Malaysia (MA63). Meri kuasa ba sektor pelajar siti pekara diperatika Perintah Besai nengah Sekretariat MA63," ku iya madah.
Iya bejaku munyi nya maya Pengerami Ramah Tamah Aidilfitri Yayasan Sarawak ditu, kena Hari Empat.
Nambahka jaku iya, Dato Sri Fadillah madah, Sabah enggau Sarawak betapi enggau penanggul ba sektor pelajar ketegal nama-nama langgur enggau pemutus digaga di Putrajaya lebih agi baka isu ngambi enggau netapka endur pengajar ngajar di Sarawak.
Ba pengerami nya, bisi 110 iku nembiak ari program besilih nembiak Yayasan Sarawak bela bisi datai.
Maya nya mega Yayasan Sarawak bisi nyain sempekat pemereti ati (MoU) enggau KPM sereta MLNG Petronas ba tuju nyungkak program besilih nembiak Yayasan Sarawak nya.
Pengerami maya nya mega digulu Menteri Pelajar, Fadhlina Sidek, Sapit Menteri Ba Opis Premier Sarawak (Pekara Korporat, Pemadah enggau UKAS) Datuk Abdullah Saidol enggau Direktor Yayasan Sarawak, Mersal Abang Rosli. -EDISI UKAS
