KUCHING: KUCHING: Unit Komunikasi Awam Sarawak (UKAS) ransing nengkebang penyulut sepemanjai taun 2024 nyengkaum pengawa ngatur media enggau program begulai enggau komuniti.
Direktor UKAS Samuel Simon madah, sekeda ari pemujur tu ke dirikod naka Oktober taun tu, UKAS udah ngeluarka 18,359 Buletin Ukas, TikTok bisi 10.8 juta kali dipeda, Facebook UKAS bisi 2.7 juta dipeda enggau ‘followers’ 243,738.
Kelimpah ari nya ku iya, UKAS udah ngaga 1,259 penerang grafik enggau 32 kali ‘live streaming’, ngaga 37 papan iklan enggau ngatur 16 bengkah kus latih.
Ba pengawa dokumentasyen, Samuel madahka UKAS udah ngumpul 3,448 penerang surat berita, ngaga 195 montaj video, lalu ngatur 1,584 isu bekaul.
Ba program besai iya madah, UKAS mega mujur ngatur 18 program Juh Randau, 463 program enggau media ti mandangka sida ransing ngenegapka kaul strategik enggau organisasyen media menua tu enggau nasional.
"Ba taun 2024 mega UKAS bela nyaup program besai baka Sarawak Media Conference 2024 begulai enggau AZAM Sarawak, HAWANA 2024 bekerejasama enggau BERNAMA sereta SUKMA enggau Para SUKMA ke-21.
"UKAS ke nyadi Komiti Publisiti, Ngelaku enggau Media udah besaup enggau bakih media ke bukai baka TVS, RTM, Bernama, FINAS enggau Astro Awani.
"Lalu kitai mega beterima kasih ngagai Datuk Abdullah enggau Datu Hii ke sukung enggau penemu ari seduai," ku iya madah.
Iya bejaku munyi nya ba Pengerami Malam Apresiasyen UKAS 2024 ditu, kena Hari Minggu.
Pengerami lemai nya dipenyadi Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol.
Maya nya mega, UKAS bisi nyuaka Anugerah Gawa Nyulut (APC) ngagai staf ke pemanah gawa enggau saup sida ngagai UKAS.
Kelimpah ari nya, UKAS bela bisi nyuaka perais ungkup pekit fotografi enggau ngarang artikel beserimbai SUKMA Ke-21 Sarawak 2024.
Ba kategori fotografi, gela champion diempu Muhammad Rais Sanusi ditangkan Mohamad Faitullah Morni ba penuduk lumur dua enggau Mohmad Nahari Nahar ngempu penuduk lumur tiga.
Ba kategori ngarang artikel, gela champion diempu Agnes Tugong, Jude Peter Toyat ba penuduk lumur dua enggau Mohammad Roji Abdullah ngempu penuduk lumur tiga.
Bela bisi datai maya nya, Sapit Sekretari Perintah Sarawak (Operasyen) Datu Hii Chang Kee, Direktor Unit Protokol, Adat enggau Pengatur Program Sarawak (UPPANS) Datu Hamdan Sharbini, Direktor Opis Pemadah Malaysia Sarawak Helmy Hamid, Tuai Pegawai Eksekutif Opis Dagang enggau Dagang Temuai Sarawak Di Brunei Darussalam (STATOB), Samat Junai, Tuai Pegawai Eksekutif Azam Ali Suhaili enggau bala temuai dipebasa ke bukai.-EDISI UKAS
