KUCHING: Pengelandik injinia deka nyaup Sarawak ngaga tiga projek besai ke disadang berengkah taun 2025 nyentuk 2030.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, agih belanja RM100 bilion baka ke diterang iya sebedau tu deka dikena ngemujur tiga iti projek besai baka Penyangkai Kapal Lebuh Tasik, Padang Bilun Antrabansa Baru enggau pemansang infrastruktur karan, ai enggau telekomunikesyen.

Ku iya, saup raban bepengelandik ba pengawa injiniaring beguna bendar dikena nentuka pemujur projek nya digaga dalam kandang lima taun tu tauka nyangka lama agi ari nya.

"Mayuh pengawa injiniaring diguna baka injinia hidraulik lebih agi bekaul sistem ai.

"Semua tu projek besai laban bisi terminal gas, sistem paip ke dikena nyambung gas," ku iya madah.

Iya bejaku munyi nya ba Pengerami Makai Lemai Institusi Kejuruteraan Malaysia (IEM) Pampang Sarawak ditu, Hari Minggu tu tadi.

Kelimpah ari nya, Premier Sarawak madah, pemutus ngaga padang bilun antarabansa ke baru endang seririh enggau pemeras Sarawak deka bisi kompeni penerebai bilun diri empu bepun ari pengawa nyual meli Maswing deka tembu diatur bulan siti agi.

Datuk Patinggi Abang Zohari sekali agi madah, pengelandik Injiniaring ba pengawa ngaga komponen bilun bela beguna dikena ngemujurka pengingin menua tu ngaga komponen nya dudi hari ila.

Maya nya iya mega madahka pengelandik ba pengawa bekaul ‘aerospace’ bela dikemeratka lebih agi perintah besai udah nentuka endur nganjung satelit digaga di Sarawak.

Bela datai ba pengerami lemai nya, Sapit Premier Sarawak Datuk Amar Profesor Dr Sim Kui Hian, Menteri Utiliti enggau Telekomunikesyen Sarawak Dato Sri Julaihi Narawi, Sekretari Perintah Sarawak Datuk Amar Mohamad Abu Bakar Marzuki, Sapit Menteri Infrastruktur enggau Pemansang Penyangkai Kapal Sarawak Datuk Ir Aidel Lariwoo, Luyar Besai Sarawak Dato Sri Saferi Ali sereta bala pemesai ke bukai.-EDISI UKAS