KUCHING: Unit Komunikasi Awam Sarawak (UKAS) ransing deka bejalaika pengawa enggau chakah agi ba taun 2025 dikena nentuka pemanah tikas servis gawa ngagai rayat.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, tusun pengawa ba opis nya deka diserenihka taun baru tu ila.
Ku iya, tu nyengkaum bisi ngaga seksyen baru ke disadang deka ngenegapka agi tanggungpengawa UKAS ngenataika berita enggau penerang ngagai rayat mayuh.
"Tu digaga kitai ketegal deka ngemanahka agi tikas pengawa UKAS ti seriris enggau tuju kitai ke nyadi pengerembai berita perintah ngenataika penerang enggau engkeman agi ngagai rayat," pia ku iya.
Iya bejaku munyi nya ba Pengerami Malam Apresiasyen UKAS 2024 ditu, kena Hari Minggu.
Datuk Abdullah madah, pekara nya sebagi ari pengeransing dikena nyungkakka UKAS ke nyadi pelasar komunikesyen perintah nengeri enggau rayat.
Ku iya, semua tu ulih ngurangka agi seraka ke bisi nyadi.
"Chara kitai gawa ba taun 2025 enda baka ngelama tu.
"Aku minta beberapa seksyen UKAS diserenih baru ba tuju kitai deka meda pengawa sikar agi dikereja," ku iya madah baru.
Pengerami maya nya diatur dikena ngerami penyulut ke udah ditempa UKAS sepemanjai taun 2024 tu nyengkaum mujur ngatur bajet 96 peratus, nengkebang 1,259 penerang grafik enggau ngaga 32 kali ‘live streaming’.
Datuk Abdullah madah, ba pengawa ngatur media, UKAS udah ngemujurka 463 program ti bisi kerejasama enggau organisasyen media menua tu enggau nasional.
Ba pengerami nya bisi 14 iku staf UKAS nerima Anugerah Servis Gawa nyulut (APC) kelimpah bela meri basa ngagai staf ke udah pinchin gawa.
Bela bisi datai maya nya, Sapit Sekretari Perintah Sarawak (Operasyen) Datu Hii Chang Kee, Direktor Ukas Samuel Simon, Direktor Unit Protokol, Adat enggau Pengatur Program Sarawak (UPPANS) Datu Hamdan Sharbini, Direktor Opis Pemadah Malaysia Sarawak Helmy Hamid, Tuai Pegawai Eksekutif Opis Dagang enggau Dagang Temuai Sarawak Di Brunei Darussalam (STATOB), Samat Junai, Tuai Pegawai Eksekutif Azam Ali Suhaili enggau bala temuai dipebasa ke bukai.-EDISI UKAS
