KUCHING: Lebih 100 orang gawa ari agensi Perintah Sarawak, Perintah Besai nyengkaum peribit dirami dalam Majlis Apresiasi Program Bebatang Sarawak 2024 ti diatur di sebuah hotel tebilang ditu kena Hari Lima.

Pengerami ngena gaya gari denim enggau burak nya richah enggau penatai Sapit Sekretari Perintah Sarawak (Operasyen) Datu Hii Chang Kee.

Bejaku ba mua mayuh rambau pengerami nya, Datu Hii madah, iya ngari ke Perintah Sarawak meri terima kasih ngagai semua orang gawa ti udah kiruh nentuka Porgam Bebatang Sarawak sepanjai taun tu bejalai lanchar.

“Tabi puji enggau terima kasih sekali agi diberi ngagai semua, nya alai taun baru kitai mega deka gawa bebendar agi ngatur program bebatang ti sebaka,” terang iya.

Ba pengerami ke sama, iya mega bisi nyuaka plak ngagai semua tuai agensi perintah nengeri, perintah besai enggau peribit kelai ngenang pemanah pengawa sida nya.

Sama datai ba pengerami nya Direktor Unit Protokol, Istiadat enggau Pengatur Program Sarawak, Datu Hamdan Sharbini, Direktor Unit Komunikasi Awam Sarawak, Samuel Simon sereta bala temuai dipebasa ke bukai.-EDISI UKAS