KUCHING: Ripot Ninting Taun Keterubah Strategi Pemansang COVID-19 2030 (PCDS 2030): Lansa 2023 nya mandangka pengeransing Perintah Sarawak ba pengelurus enggau pemansang meruan wilayah tu.

Sekretari Perintah Sarawak, Datuk Amar Mohamad Abu Bakar Marzuki madah, ripot nya meri peragam nyata pasal pejalai Sarawak naka diatu, udah nya nerang lenak strategi ti dikereja enggau chakah enggau berani agi sereta neladan pemujur ti udah dijapai.

“Pemujur dijapai ti dipandang dalam ripot tu ukai semina statistik aja laban nya ngelansa empas kebendar ngagai pengidup komuniti, di tetiap mengeri enggau genturung pendiau, genap serak penatai pemisi enggau tetiap asal penatai budaya di Sarawak.

“Pemujur ti dijapai tu nunjukka bida ti datai ari pengawa kami meri peluang enggau ngangkatka tikas pengidup nadai ngira dini tauka sapa sida,” ku iya.

Iya bejaku munyi nya lebuh Pengawa Ngelanchar Strategi Pemansang Pengudah Covid-19 (PCDS) 2030: Lansa 2023 ti diatur di Wisma Bapa Malaysia ditu Hari Lima.

Datai bejadika pengawa nya Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg disempulang dua Sapit Premier Sarawak Datuk Amar Douglas Uggah Embas enggau Datuk Amar Profesor Dr Sim Kui Hian.

Datuk Amar Mohamad Abu Bakar madah baru, semangat kerejasama ari semua raban ngemujurka juluk tu patut ditambah ngambi servis di wilayah tu ulih terus dikemanah ba pengawa nangkup peminta rayat Sarawak ti seruran berubah.

Ripot Ninting Taun Keterubah PCDS 2030: Lansa 2023 nunjukka sekeda pemujur besai dijapai ti matak perati nyengkaum dalam sektor kilang ti mujur matak pengawa beranakka puku penyampau RM21.5 bilion ari 2021 nyentuk 2023, nyendiaka lebih ari 11,000 peluang kereja baru.

Entara sektor bukai ti nyadi perati iya nya sektor dagang temuai ke alai Sarawak ngerikod 3.9 juta penatai temuai ba taun 2023 ti meri asil ngagai RM9.99 bilion penatai pemisi di wilayah tu seraya sektor kampung udah mai Sarawak mujur nanam 32.5 juta pun kayu ari taun 2021 ngagai 2023.


Seraya sektor infrastruktur enggau utiliti udah meda Sarawak mujur numbuhka mayuh rentayan jalai penyauh 31,577 kilometer enggau bungkur kuasa karan selampur Sarawak udah nyapai 99.4 peratus seraya ai ba tikas 84.3 peratus.

Sektor kepenudi ti diberi perati dalam ripot nya iya nya sektor kuasa ulih dikemaru ke alai Sarawak mujur ngetanka 60 peratus champur kapasiti kuasa ulih dikemaru enggau nyual lima juta Setipikit Kuasa Ulih Dikemaru (REC) ba taun tu.

Sama datai bala Menteri enggau Sapit Menteri Kabinet Sarawak, Sekretari Pekara Wang Sarawak Dato Sri Wan Lizozman Wan Omar, Sapit Sekretari Perintah Sarawak (Perambu Ekonomi enggau Pemansang) Dato Sri Dr Muhammad Abdullah Zaidel, Sapit Sekretari Perintah Sarawak (Operasyen) Datu Hii Chang Kee, Sapit Sekretari Perintah Sarawak (Administrasyen) Datu Buckland Bangik, Penyanding Penemu di Opis Premier Sarawak Datuk Amar Jaul Samion sereta bala tuai opis perintah nengeri. - EDISI UKAS