KUCHING: Perintah Sarawak enda minta sebarang pengawa mayar pulai Bantu Duit Belanja ti diberi ngagai bala nembiak ari nengeri tu ti nampung pelajar di Institusyen Pelajar Tinggi (IPT).

Berita manah nya dibantaika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg lebuh bejadika Pengawa Ngelanchar Strategi Pemansang Pengudah Covid-19 (PCDS) 2030: Lansa 2023 ti diatur di Wisma Bapa Malaysia ditu kena Hari Lima.

“Duit belanja sepenyampau RM1,200 deka diberi kitai pechuma ngagai nembiak ungkup dua semester, reti nya sida bisi lebih ari RM100 sebulan laban dalam semester, sida bisi kemisi.

“Sida ulih ngena duit nya meli pemakai lalu semua tu pechuma ari Perintah Gabungan Parti Sarawak (GPS) laban kitai meretika penusah nembiak enti sema sida nadai duit belanja,” terang iya.

Iya madah, pengawa meri RM1,200 tu singkang keterubah Perintah Sarawak negapka pengawa pelajar di wilayah tu kelimpah ari inisiatif pelajar pechuma ba taun 2026 ila.

“Dalam tengan kedua renggat PCDS 2030 tu iya nya belabuh taun 2026 kitai deka meri pelajar tinggi pechuma di Universiti enggi wilayah tu enggau tentu mega pengawa tu begunaka mayuh belanja.

“Tang, aku ulih meri jamin, semua tu ulih dikereja kitai laban aku udah nengkira semua nya,” ku iya.

Sama datai dua Sapit Premier Sarawak Datuk Amar Douglas Uggah Embas enggau Datuk Amar Profesor Dr Sim Kui Hian, bala Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri Kabinet Sarawak, Sekretari Pekara Wang Sarawak Dato Sri Wan Lizozman Wan Omar, Sapit Sekretari Perintah Sarawak (Perambu Ekonomi enggau Pemansang) Dato Sri Dr Muhammad Abdullah Zaidel, Sapit Sekretari Perintah Sarawak (Operasyen) Datu Hii Chang Kee, Sapit Sekretari Perintah Sarawak (Administrasyen) Datu Buckland Bangik, Penyanding Penemu di Opis Premier Sarawak Datuk Amar Jaul Samion sereta bala tuai opis perintah nengeri. - EDISI UKAS