KUCHING: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah nerima penemuai basa ari Kaban Kaunsil Tabung Amanah Bakun di Wisma Bapa Malaysia ditu kena Hari Lima.
Diligit Kaunsil Tabung Amanah Bakun udah betuai ke Sapit Menteri Utiliti enggau Telekomunikasyen Sarawak Datuk Liwan Lagang.
Lebuh dirandau media, iya madah, tuju pejalai nemuai diligit nya deka minta belanja ungku wang turu sida ti diatu majak kusut pengudah semina bulih belanja RM10 juta lebuh pengawa numbuh ke Tabung Amanah Bakun maya 27 taun ke udah iya nya ba taun 1997.
Ku iya, belanja nya deka dikena meri sekularship ngagai nembiak chara 'one-off' semina ulih nyangkung tujuh taun da enggau RM6 juta belanja ti beteda enggau RM4 juta dalam aset enggau RM2 juta dalam mata duit.
“Nya alai, randau begulai enggau Premier Sarawak tu minta sanding penemu, minta belanja enggau udah nyua surat peminta.
"Kami minta ngambi ke Sarawak Energy Berhad (SEB) meri belanja nyadi siti ari Tanggungpengawa Sosial Korporat (CSR) ngagai Tabung Amanah Bakun nyengkaum ngagai peranak di Murum ti deka diberi nengah wang turu tu,” terang iya.
Kaban Kunsil Nengeri (ADUN) Belaga nya madah, raban sida udah minta belanja sepenyampau RM1 juta ungkup peranak di Bakun enggau RM1 juta da ungkup peranak di Murum ti deka diberi ninting taun.
Iya madah, belanja nya ila mega ukai semina ungkup nembiak aja tang mega ngagai peranak di dua kandang menua nya ungkup bantu enggau ke bukai.
Sama datai, ADUN Murum Kennedy Chukpai Ugon.
Dulu ari nya, Amanah Hartanah Bumiputera (AHB) udah nyuaka Wakalah Zakat penyampau RM100,000 nyadi wakalah agihan ari zakat dagang ungkup taun 2023.
AHB diari ke Direktor Pengatur Kumpulan Mohamad Damshal Awang Damit udah nyuaka zakat nya ngagai raban Tabung Baitulmal Sarawak (TBS) ti diari ke Yang Dipertua Majlis Islam Sarawak Datuk Misnu Taha.
Sama datai ngemataka pengawa nya, Menijar Besai TBS Datu Abang Mohd Shibli Abang Mohd Nailie, Sapit Menijar Besai AHB Nadia Edmaz Abdul Hadi enggau Tuai Pegawai Eksekutif PHB Asset Management Zulkifli Ishak. -EDISI UKAS
