KUCHING: Bala nembiak Sarawak ti benung nampung pelajar di Institusyen Pelajar Tinggi (IPT) di selampur Malaysia nerima manah inisiatif bantu duit belanja ti dibantaika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Tuju bantu nya dikena ngelempungka tating belanja nembiak ba taun 2025, ke alai tetiap nembiak deka nerima duit belanja sepenyampau RM1,200 nadai ngira tikas penatai pemisi sida sebilik.

Siku nembiak di Kolej Universiti ICATS, Dellnish Wan Ullis madah ke diri beterima kasih enggau gaga ke bantu ti diterima, laban nya ulih mantu ngelempungka tating belanja ditapi nembiak, kelebih agi nembiak ti jauh ari sida sebilik enggau napi belanja idup ti tinggi.

Dellnish mega meri terima kasih ngagai Perintah Sarawak ke pemeri laptop pechuma, ti ulih ngelempungka agi belanja apai indai sida.

"Kami chukup beterima kasih enggau besemaya deka naka ulih ngemegahka Sarawak, laban bemacham bantu ti udah diberi ngagai kami,” ku iya.

Seraya siku da nembiak di IPT ti sama, Elviana Orai, mega bekunsika pengagit diri ke inisiatif nya.

Ba iya, bantu belanja baka nya meri peluang ngagai mayuh agi nembiak nampung pelajar, ti sebedau tu engka tejanggal ketegal suntuk belanja.

“Ari pemisi bantu tu, semangat kami belajar tentu mega majak tinggi. Ba aku empu, aku deka ngena bantu mayar bayar buding enggau belanja besehari sehari sekumbang belajar,” terang Elviana.

Sepenyampau 60 nembiak IPT ti datai ari Unimas enggau ICATS udah ngatur penemuai seraya belajar ke Kunsil Nengeri (DUN) Sarawak kena Hari Tiga.

Ba penemuai nya, bala nembial bisi peluang meda empu simpul jurai dibantaika Premier Sarawak ba hari kepenudi Aum DUN Sarawak Ke-19. -EDISI UKAS