KUCHING: Kontinjen Sarawak deka meras agi dikena nentuka pemujur dalam edisi Lumba Se-Malaysia (SUKSEM) ke-10 di Perak ba taun 2026.

Sapit Sekretari Perintah Sarawak (Administrasyen), Datu Buckland Bangik madah, pengawa nyerenih semua pekara deka dipejalai ngambi ngaga analisis prestasyen kontinjen Sarawak dalam SUKSEM 2024.

Taja pia, iya muji pengawa tim nya mantaika penyulut taja bulih penuduk keempat taun tu.

“Kami kala nyadi champion edisi Selangor tang ba penuduk keempat di Terengganu. Nya alai, lebuh ngaga serenih, kami patut ngaga analisis dalam enggau luar.

"Ungkup edisi nangkan tu, kita patut sedia enggau manah, meras agi enggau ngaga pemadu manah. Sebarang pengawa digaga kitai, seruran bisi pekara ti tau dipelajar kitai,” ku iya.

Chef de Mission (CDM) kontinjen Sarawak nya bejaku ba Majlis Apresiasi Kontinjen SUKSEM 2024 Sarawak di sebuah hotel tebilang ditu kena Hari Empat.

Datu Buckland mega meri terima kasih ngagai pengeransing enggau disiplin ti ditunjuk semua atlit sekumbang pekit nya diatu.

Ungkup rikod, kontinjen tuai rumah, Terengganu dipadu nyadi champion penuh SUKSEM 2024 seraya Sabah enggau Perak ba penuduk kedua enggau ketiga.

Pekit nya diatur ari 15 nyentuk 19 Oktober enggau Sarawak nurun bepekit ba 10 lumba enggau main iya nya main bol, badminton, bola jaring, pingpong, sepak takraw, golf, carrom, boling padang, boling tenpin, enggau e-sukan.

Sama bisi datai Direktor Unit Administrasyen ti mega Sapit CDM Kontinjen Sarawak, Datu Mohamad Junaidi Mohidin, Direktor Unit Pengelikun enggau Penerit Adat Sarawak (UKPS), Datu Dr Chai Khin Chung, Direktor Unit Komunikasi Awam Sarawak (UKAS), Samuel Simon, Direktor Unit Pengatur Pengawa Imigresen enggau Buruh, Richard Lon enggau temuai dipebasa bukai. -EDISI UKAS