LUNDU: Projek Bekal Ai Wilayah Lundu Sematan ti deka belabuh taun baru disadang tembu menyana ba taun 2027.

Kaban Kunsil Nengeri (ADUN) Tanjong Datu, Azizul Annuar Adenan madah, Perintah Sarawak nengah Opis Menteri Utiliti enggau Telekomunikasyen Sarawak udah ngemendarka agih belanja RM200 juta dikena ngaga loji meresi ai ti baru di Lundu.

Pekara nya udah diterangka Menteri Utiliti enggau Telekomunikasyen Sarawak, Dato Sri Julaihi Narawi dalam simpul jurai MUTS serimbai enggau Aum Kunsil Nengeri (DUN) Sarawak Ke-19 empai lama.

Azizul bisi nerang, Perintah Sarawak mega meri belanja sepenyampau RM779,000 dikena nyendiaka 917 tangki ai penabat dikena mutar penanggul suntuk ai di sitak DUN nya.

Pengawa nyerahka tangki ai nya udah dipenyadika iya empu ngagai Tuai Raban Bansa enggau Tuai Komuniti (KMKK) di baruh konstituensyen iya, bepalan di Opis Pelilih Lundu kena Hari Empat.

Bekaul enggau pengawa ngagihka tangki ai nya ngagai komuniti, Azizul ngarap ke KMKK deka matau semua proses nya ngambi tetiap rumah ti begunaka tangki ai nerima pemeri nya lalu ulih ngena sebedau projek bekal ai tembu menyana taun 2027.

Sama bisi datai, Pegawai Pelilih Lundu Awang Yusup Awang Mostapha. -EDISI UKAS