POZNAN: Sarawak deka negapka agi kerejasama enggau wilayah Wielkopolska di Poland ba tuju nentu pemeruan dunya tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, tu ulih dipunka enggau program besilih nembiak universiti di Wielkopolska enggau Sarawak.
"Pengawa kitai tu deka nempa penemu ke manah ba rayat dua buah menua," ku iya madah maya pengerami makai lemai meri basa ngagai Marshal Wilayah Wielkopolska, Marek Wozniak ditu, Hari Empat.
Dulu ari nya, Marek ngelaluka Datuk Patinggi Abang Zohari nyadi pengelicha panel Forum Hidrogen Eropah Tengah Kali Ke-3 ti bela kelai basa ngagai Sarawak ba pengawa bekaul nentu pemeruan rampa menua ba mata dunya.
Maya nya mega, Premier Sarawak ngelaluka Marek nemuai ngagai Sarawak ukai semina ngulu gempuru besai tang ngambika nemu Sarawak semak lebih agi bekaul inisiatif sereta penemu bekaul kuasa gadung.
Sekeda ari kongres alai Sarawak nyadi tuai rumah gempuru besai dunya iya nya Kongres enggau Program Pemandang Ai Dunya Antarabansa ke diatur ba taun 2028 ila.
Ba pengawa lemai nya, Marek madahka diri bebasaka penemu Sarawak ti bela tikas enggau menua Eropah ke bukai senentang isu bekaul ubah klimet dunya.
Iya ngarapka pemeras nya mengkang ditan besaup enggau menua Eropah ke bukai ba tuju ngurangka agi ubah klimet dunya ti majak ngirauka ati.
Bela datai maya nya bini Premier Sarawak Puan Sri Datuk Amar Juma’ani Tun Tuanku Bujang, Sapit Premier Sarawak Datuk Amar Awang Tengah Ali Hasan, Duta Besai Malaysia ke Poland Dato Chitra Devi Ramiah, Sekretari Perintah Sarawak Datuk Amar Mohamad Abu Bakar Marzuki, Tuai Sekretari Politik ngagai Premier Sarawak Fazzaruddin Abdul Rahman sereta bala deligit perintah nengeri ke bukai.-EDISI UKAS
