KUCHING: Perintah deka ngaga 3,674 kuarters ba selampur Sarawak ke diungkup ngagai orang kereja perintah lebih agi di menua pesisir.

Menteri ba Opis Premier Sarawak Dato Sri John Sikie Tayai madah, projek nya disadang berengkah digaga seretai nitihka renggat dalam kandang 24 ngagai 48 bulan.

Ku iya, ba Pelilih Daro enggau Bintulu, projek ‘Service Quarters’ bela dipasuk ba rintai dulu ti dipelabaka ulih berengkah tengan taun 2025.

"‘Service Quarters’ tu baka pangsapuri moden ti disikap enggau balai serebaguna, dobi, surau enggau kedai mit," ku iya madah.

Iya madah munyi nya maya nyimpul jurai ari opis menteri iya ba Aum Kunsil Nengeri (DUN) Sarawak Ke-19, Hari Satu.

Ba pekara bukai, Dato Sri John Sikie madah, taba ngaga projek Opis Pelilih Lingga enggau Opis Pelilih Mit Maludam udah dikemendarka digaga Kaunsil Pengatur Nengeri.

"Dua iti projek tu disadang deka berengkah suku ketiga taun 2025 dalam kandang 24 bulan.

"Agensi pengatur dua iti projek tu iya nya Opis Kereja Raya (JKR) Sarawak," ku iya madah baru. -EDISI UKAS