KUCHING: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi deka ngulu pengerami nyambut 100 Taun Sempekat Pengelikun Kapit 1924-2024 ke deka diatur enda lama agi.

Menteri Kereja Raya Dato Sri Alexander Nanta Linggi madah, pengerami ngelai 100 taun sempekat pengelikun nya diatur kena 5 ngagai 8 Disember tu ti bela disempulang enggau macham program ke disadang bela digulu urung 500 iku bala bukai.

Ku iya, program nya nyengkaum seminar ti mantaika keretas kereja bekaul sejarah enggau daya idup ari raban antropologi.

"Bala mayuh ke datai ila nyengkaum tuai komuniti Dayak di Sarawak enggau pengari ari Kalimatan, Indonesia.

"Kebuah pia, sempekat pengelikun nya suba bela ditanggam bansa Dayak Sarawak enggau Kalimantan," ku iya madah maya dirandau media udah ke ngatur penemuai basa ngagai Tun Pehin Sri Dr. Wan Junaidi enggau Toh Puan Datuk Patinggi Fauziah di Astana Negeri Sarawak, Hari Satu.

Nambahka jaku iya, Dato Sri Alexander madahka Tun Pehin Sri Dr Wan Junaidi dipelabaka datai ngulu pengerami nya kena 8 Disember tu ila.

Kelimpah seminar, ku iya ke mega Kaban Parlimen Kapit madah, pengerami ila bela disempulang enggau regatta pekit lumba perau laju.

Kepenemu mayuh, tu penemuai keterubah Tun Pehin Sri Dr. Wan Junaidi ke Kapit sepengudah diangkat nyadi Yang di-Pertua Negeri Sarawak.

Bela datai maya penemuai basa nya Chairman Yayasan Tun Jugah Datuk Patinggi Tan Sri Leonard Linggi Jugah, Sapit Menteri Utiliti enggau Telekomunikesyen Datuk Liwan Lagang, Sapit Menteri ba Opis Premier Sarawak (Undang-Undang, Adat enggau Main Asal) Datuk Jefferson Jamit Unyat, Kaban Kunsil Nnegeri (ADUN) Pelagus Wilson Nyabong Ijang, ADUN Murum Kennedy Chukpai Ugon, ADUN Katibas Lidam Assan, ADUN Baleh Nicholas Kudi Jantai, Residen Sitak Kapit Galong Luang, Pegawai Pelilih Belaga Bidah Lujah sereta bala bukai. -EDISI UKAS