KUCHING: Aum media khas deka diatur beserimbai Aum Kunsil Nengeri (DUN) Sarawak ke deka berengkah 6 Mei tu ila dikena nimbal penemu nganti nama DUN ke enda ngena jaku nengeri agi.
Speaker DUN Sarawak, Tan Sri Datuk Amar Mohamad Asfia Awang Nassar madah, iya semina ulih nerangka pekara nya maya aum media nya ila.
"Sapa madah? Ila tanya ba aum media khas DUN lalu aku deka nimbal. Nyangka tu semina ubah mit.
"Enti aku madah diatu, tu deka ngenataika pekara bukai. Nama-nama ke ditanya ila, aku deka nyaut," ku iya maya dirandau media ba Pengerami Nerima Pengabang Aidilfitri Petronas di Hilton Kuching, lemai Hari Tiga.
Kelimpah ari nya, iya mega enggai ngelansa silik lalu madahka deka ngatur aum khas bekaul pekara nya udah Hari Orang Gawa (1 Mei) ila.
Sebedau tu, Sapit Menteri ba Opis Premier Sarawak (Undang-undang, MA63 enggau Kaul Nengeri-Perintah Besai) Datuk Sharifah Hasidah Sayeed Aman Ghazali madah, engkeman alai leka jaku 'nengeri' enda dikena agi ba DUN iya nya DUN nengeri diganti ngagai Kunsil Sarawak.
Iya madah, pekara nya seriris enggau Sempekat Malaysia 1963 (MA63) laban Sarawak diatu siti 'wilayah', ukai nengeri. -EDISI UKAS
