POZNAN: Forum Teknologi Hidrogen Eropah Tengah ke diatur di Poznan ditu mandangka Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg bekunsika pemeras Sarawak ba pekara bekaul kuasa ulih dikena baru enggau karbon.
Premier Sarawak ba ripot TVS bisi madahka iya ba program nya berandauka inisiatif enggau langgur Sarawak ke deka nyungkakka pengelikun kuasa enggau pemeruan rampa menua kelimpah bisi madah enggau nyemetak bekaul pelin proaktif Sarawak dikena napi penanggul klimet global.
"Taun 2023 diripotka pemadu angat ba sejarah, ba Sempekat Paris, tikas pengangat manggai ba baruh 1.5 degrees celsius besai reti tang mai penguji.
"Udah pandemik COVID-19 ngelekai, perintah Sarawak numbuhka Pelin Pemansang Udah COVID-19 (PCDS) 2030 ti bela ngemeratka pemeruan rampa menua," pia ku iya.
Maya nya iya mega madahka Sarawak benasit manah laban bisi pengaya ba pengereja asal baka kuasa hidro, solar enggau biojisim.
"Ketegal nya Sarawak nadai penanggul ngasilka hidrogen alai perintah nengeri mega udah berengkah ngepunka langgur deka ngena hidrogen nyadi batang pun penatai kuasa," ku iya nerang.
Bela nyempulang penatai iya maya nya Sapit Premier Sarawak Datuk Amar Awang Tengah Ali Hasan, Sekretari Perintah Sarawak Datuk Amar Mohamad Abu Bakar Marzuki, Duta Besai Malaysia ke Poland Dato' Chitra Devi Ramiah enggau Marshall Wilayah Wielkopolska, Marek Wozniak.-EDISI UKAS
