KUCHING: Niang Laskar Kanan Joanna Felicia Rohna udah dibai pulai, datai ba Pangkalan Udara Kuching pukul 11.54 malam tadi ngena bilun C130 enggi Soldadu Langit Diraja Malaysia (TUDM).
Niang siku ari sida ti bebadi ba penusah dua buah helikopter belantak ba Pangkalan Tentera Laut Diraja Malaysia (TLDM) Lumut, Perak.
Penatai tubuh niang diambat Sapit Menteri Industri Pemakai, Komoditi enggau Pemansang Kandang Menua Sarawak Datuk Martin Ben, Kaban Kunsil Nengeri (ADUN) Bukit Semuja John Ilus sereta bala niang sebilik.
Niang nangkan nya dibai ngagai menua iya di Kampung Engkeroh, Tebakang, Serian sebedau dianjung, 25 April, pukul 9 pagi ba Pendam Kristian menua nya.
Niang Joanna beumur 26 taun peranak asal Kampung Sumpas Tampek, Serian, siku raban Soldadu Tasik Diraja Malaysia (TLDM) bebadi maya ngena sebuah helikopter enggau enam iku bala ke bukai.
Kena Hari Dua tu tadi, penusah bebadi dua buah helikopter enggi TLDM nya belantak maya belatih beserimbai Pengerami Nyambut Penumbuh TLDM ke-19 ti ngujungka 10 iku sida bebadi.
Semua sida tu iya nya Komander Muhammad Firdaus Ramli, Komander Muhamad Amir Mohamad, Leftenan Komander Wan Rezaudeen Kamal Wan Zainal Abidin, Leftenan Komander Mohammad Amirulfaris Mohamad Marzukhi, Leftenan Sivasutan Thanjappan, Pegawai Waran II TLR (AQM) Muhammad Faisol Tamadun, Pegawai Waran II TNL Noorfarahimi Mohd Saedy, Pegawai Waran II TMK Mohd Shahrizan Mohd Termizi, Bintara Muda TNL Noor Rahiza Anuar enggau niang Joanna.-EDISI UKAS
