KUCHING: Perintah nengeri diatu benung beratika pengawa bekaul numbuhka Opis Berikan Sarawak.
Sapit Menteri Industri Pemakai, Komoditi & Pemansang Kandang Menua Sarawak Datuk Dr. Abdul Rahman Ismail madah, pekara nya beguna bendar dikena nyungkakka agi sektor berikan.
Ku iya, sebedau tu semua sektor betanam betupi digaga nengah siti opis aja lalu langgur perintah Sarawak diatu deka meda opis-opis perintah ngemeratka siti sektor aja.
"Dua taun sebedau tu Opis Servis Veterinar Sarawak mujur ditumbuhka lalu diatu perintah benung deka numbuhka Opis Berikan ba tuju nyungkakka agi industri berikan.
"Diatu langgur tu agi benung dilangkar kelimpah kitai benung berandau enggau nengeri bukai ke bisi opis ke sebaka nyengkaum di Sabah.
"Kitai nguji, enti ulih sebedau aum kunsil nengeri diatur iya nya bulan November ila tang nyema empai besedia nyangka kitai deka bejuraika langgur tu ba aum nya taun siti agi," ku iya madah.
Iya nerangka pekara nya maya dirandau media udah Bejadika Pengerami Konvensyen Orang Dagang Betanam Betupi Opis Betanam Betupi Sarawak ditu, Hari Tiga.
Nambahka jaku iya, Datuk Dr. Abdul Rahman mega madahka Opis Berikan nya ila deka nambah industri besai di nengeri tu.
"Nengah opis tu, kitai deka bisi siti opis ti matau produk enggau industri besai ba sektor betanam betupi nyengkaum utai tumbuh, veterinar enggau pengawa berikan," ku iya sambil madahka pengawa nya siti ari inisiatif besai Perintah Sarawak.
Bela datai maya nya Sapit Menteri Industri Pemakai, Komoditi enggau Pemansang Kandang Menua Sarawak (Komoditi enggau Pemansang Kandang Menua) Datuk Martin Ben sereta bala bukai. -EDISI UKAS
