KUCHING: Sukung ari orang kereja perintah nengeri enggau perintah besai sereta macham agensi enggau raban voluntia nyadi batang kebuah pengawa ngatur Para Lumba Malaysia (SUKMA) Ke-21 Sarawak bulan September tu tadi mujur.

Sapit Premier Sarawak, Datuk Amar Awang Tengah Ali Hasan enggau nya beterima kasih ngagai sida ti dipeda bebendar nentuka lumba nya diatur datai ba tuju.

"Kerejasama semua tu baikka ba pelin, logistik, pekara pengelikun enggau nyendiaka perengka guna ke chukup nyadi batang kebuah Para SUKMA diatur enggau mujur," ku iya madah.

Iya bejaku munyi nya maya Pengerami Makai Lemai Apresiasyen Para SUKMA Ke-21 ditu, lemai Hari Dua.

Iya mega ngenataika jaku terima kasih ngagai Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah ti megai tanggungpengawa ke besai nyadi Menteri Pengatur Para SUKMA XXI sereta Tuai Kontinjen Sarawak, Datuk Mohamad Razi Sitam enggau Tuai Pegawai Eksekutif Para SUKMA, Datu Hii Chang Kee ti nentuka pemujur lumba nya lalu mai Sarawak nyadi champion ke sekali tu.

Dulu ari nya ba jaku iya, Dato Sri Fatimah madahka opis menteri iya bisi penemu deka numbuhka Unit Pemansang Lumba Orang Timpang Pendiau (OKU) ba tuju nyungkakka lumba enggau main ba raban nya.

Ku iya, tiga batang pekara deka dikemerat dikena numbuhka unit tu iya nya Nyidi sereta Ngemansang Pengelandik enggau Chakah sereta Kolobaratif, Pemansang Profesional sereta Kus Latih Sains Lumba ungkup 'jurulatih'.

"Peneleba ke dikembuan patut disungkakka agi nyadi peluang alai kitai belajar, ngatur pelin, nengkebang penemu enggau tim lalu nyerenih manah tikas pengulih nyadi pengatur program betikas besai," ku iya madah.

Ba lumba nya empai lama, kontijen Sarawak mujur ngambi baru gela champion bepun ari pemujur bulih 82 midul emas, 51 pirak enggau 72 engkeraju.

Bela datai ba pengerami nya Sapit Menteri Pemansang Indu, Nembiak Mit enggau Pengelantang Komuniti Sarawak (Pemansang Indu enggau Nembiak Mit) Datuk Rosey Yunus, Sapit Menteri Pemansang Indu, Nembiak Mit enggau Pengelantang Mensia Mayuh Datuk Mohamad Razi Sitam, Sapit Sekretari Perintah Sarawak (Operasyen) Datu Hii Chang Kee, Sekretari Mendam KPWK ke mega Sekretari Begulai Para Sukma XXI Sarawak 2024 Datu Felicia Tan Ya Hua, Sekretari Mendam Opis Menteri Infrastruktur enggau Pemansang Penyangkai Kapal Sarawak Datu Chiew Chee Yau sereta bala pemesai ke bukai.-Edisi UKAS