LONDON: Sarawak benung nyungkakka pemansang pengelandik dikena ngaga produk semikonduktor baka silikon, geranium enggau galium arsenide nengah kerejasama begulai enggau pemain industri di United Kingdom (UK).
Sapit Premier Sarawak, Datuk Amar Awang Tengah Ali Hasan madah, pemansang pengelandik ba macham bengkah pekara dikembuan rayat Sarawak beguna bendar dikena nentuka penegap penuduk Sarawak ba platform global.
Iya andal rayat Sarawak mega ulih besemekih enggau orang menua bukai ketegal diatu udah bisi kompeni luar meli produk semikonduktor digaga Sarawak.
Datuk Amar Awang Tengah ke mega Menteri Pengeraja Asal enggau Pemansang Mengeri II madah, Samalaju High Tech Park siti ari palan ke engkeman alai kompeni menua bukai numbuhka kompeni sida lalu orang gawa ulih diambi ari rayat menua empu ti tau digagaka nyadi pelasar ngemansangka pengelandik.
Bekaul teknologi biojisim, Menteri Dagang Antarabansa, Industri enggau Pemeranak Puku nya madah, program nemuai ngagai Loji Kuasa Drax di Leeds, London mujur bendar alai bala deligit maya nya diterangka chara baka ni lais kayu digaga nyadi kuasa beresi di United Kingdom.
"Ba pekara tu, siti kompeni ba menua iya nya Samling udah bisi eksport lais kayu ngagai menua bukai.
"Nya alai, kitai bisi pengelebih ngemansangka teknologi ke sebaka enda lama agi," ku iya ngelansa program nemuai ngagai Leeds enggau London, Hari Dua.
Datuk Amar Awang Tengah siku ari deligit perintah nengeri ti betuaika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau Sekretari Perintah Sarawak, Datuk Amar Mohamad Abu Bakar Marzuki nemuai bejalaika pengawa perintah ngagai London enggau Poland. -EDISI UKAS
