LONDON: Perintah Sarawak ngembuan pengandal ngagai semikonduktor kompoun ulih ngerandang awak baru ba pengerembai, inovasyen sereta besemekih ba renggat rantau tu enggau global.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, kerejasama strategik Sarawak enggau bakih industri tebilang di United Kingdom (UK) ba pemansang semikonduktor kompaun dikeandalka ulih nyungkak inovasyen ti nambahka pengulih chip mikro ba pengawa nengkebang teknologi enggau aplikasyen baru.
Ku iya, perintah Sarawak meda semikonduktor kompaun beguna bendar ngagai inovasyen, pengerembai ekonomi enggau pemansang meruan nengeri.
"Kitai andal teknologi tu ulih ngerandang jalai baru ba penumbuh, inovasyen sereta besemekih baikka ba renggat rantau tu tauka global," pia ku iya.
Iya bejaku munyi nya maya Pengawa Nyain Sempekat Pemereti Ati Sarawak Microelectronics Design (SMD) Semiconductor enggau Compound Semiconductor Applications (CSA) Catapult ari United Kingdom (UK) di Dewan Rakyat, Parlimen UK, Westminster, Hari Dua tu tadi.
Sarawak SMD Semiconductor Sdn Bhd maya nya diarika Tuai Pegawai Eksekutif Shariman Jamil lalu CSA Catapult diarika Tuai Pegawai Eksekutif sida, Martin McHugh.
Nambahka jaku iya, Datuk Patinggi Abang Zohari madah, Sarawak udah berengkah ngaga semikonduktor ba pengujung taun 1990-an suba lebih agi 'fabrikasi wafer' ti ngena silikon.
"Berengkah ari nya, ukai semina nyungkak pemansang enggau nambah penyampau asil tang kitai mega ditemu tauka dikelala ba renggat global ngaga semikonduktor," ku iya madah baru.
Kelimpah ari nya ku iya, kenyau beberapa taun tu, landskap semikonduktor udah napi ubah alai semikonduktor kompaun dipeda nyadi pemun ngagai teknologi rebak ke deka datai.
"Enda baka semikonduktor ngena silikon dulu suba, semikonduktor kompaun tu bisi pengulih ti enda ulih dibanding ngilah macham bansa aplikasyen ari sistem telekomunikesyen enggau kuasa nyadi elektronik pemadu moden.
"Sebagi ari kompaun bisi pengelebih transformastif ngilah industri. Ba arus 5G, tu ulih nganjung data jampat agi kelimpah ngembuan kapasiti ke besai," ku iya nerang.
Bela datai maya nya Sapit Premier Sarawak Datuk Amar Awang Tengah Ali Hasan, Sekretari Perintah Sarawak Datuk Amar Mohamad Abu Bakar Marzuki, Menteri Teknologi enggau Ekonomi Digital UK, Saqib Bhatti enggau Kaban Parlimen UK, Stephen Metcalfe. -EDISI UKAS
