Pengeransing & Pengeransing Raban Nembiak Ungkup Pemansang Sarawak Dudi Hari
Disiarkan pada 10 Nov 2024
Sumber Berita: UKAS
GEDONG: Tuai Raban Nembiak Parti Pesaka Bumiputera Bersatu (PBB), Miro Simuh, nyemetak madahka pengeransing patut diteruska, kelebih agi raban nembiak, dikena nentuka pengidup ke meruan agi dudi hari ungkup Sarawak.
Iya mega ngaku sukung raban nembiak ba Program Gempuru Raban Nembiak PBB Sarawak udah ngayanka semangat raban nembiak dikena ngetan hak sereta pengidup dudi hari nengeri tu.
“Pelin jelajah Sarawak ti diperambu raban nembiak tu ngembuan tuju dikena nentuka pejalai politik sereta sada raban nembiak nyarih didinga di nengeri tu.
“Program tu nyadi pelasar dikena nyerakup kuasa, penemu sereta semangat raban nembiak dikena neruska pengawa tu,” ku iya.
Iya madah munyi nya maya bejaku ba Program Gempuru Raban Biak PBB Sarawak ti dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, di Balai Datuk Patinggi Ali, Gedong, Hari Minggu.
Iya ke mega ADUN Serembu madah ke program jelajah Raban Nembiak PBB udah tu deka diatur ba Betong kena 25 Januari 2025.
Ku iya, ba tiap zon di Sarawak deka dilawa dikena nempa momentum nyentuk pengawa bepilih besai di nengeri tu.
Pia mega, Miro minta mayuh agi kaban exco ari Raban Nembiak diberi peluang gawa ba ejensi beguna tu dikena negapka raban nembiak ba pemansang nengeri.
“Kitai ukai semina nentuka Sarawak majak mansang, tang mega narak raban nembiak ti ke chakah ngaul diri ba ekonomi, dagang sereta inovasyen,” ku iya .
Berebak enggau nya, Miro Simuh udah meri perambu ngambika inkubator dagang diatur ba tiap pelilih di Sarawak dikena meri peluang ngagai nembiak ba pengawa dagang
Iya mega merambu ngaga trek motor di Gedong nentuka raban nembiak mandangka bakat sida ba lumba motor enggau likun agi.
Miro mega andal nengah sukung ari raban nembiak, PBB enggau GPS deka terus ngeluan Sarawak nuju pengidup ke manah agi.
Sama datai, Bala Sapit Tuai Parti PBB Sarawak Datuk Amar Douglas Uggah Embas enggau Datuk Amar Awang Tengah Ali Hasan, Mandal Tuai Kanan Parti PBB Sarawak Dato Sri Dr. Stephen Rundi Utom, Sekretari Besai Parti PBB Sarawak Dato Sri Alexander Nanta Linggi, Tuai Raban Nembiak Parti PBB Sarawak Miro Simuh, Tuai Raban Indu Parti PBB Sarawak Dato Sri Fatimah Abdullah, bala temuai dipebasa menteri enggau sapit menteri, Chairman Program & Sekretari Politik Premier Sarawak Afiq Fikri Brahim sereta Bala Tuai PBB selampur Sarawak. -EDISI UKAS
