LONDON: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madahka tuju program nemuai bejalaika pengawa perintah tiga hari ngagai United Kingdom (UK) mujur dipenyadi.
Datuk Patinggi Abang Zohari madah, asil ari program nya deka dipenyadi ba pengawa nyungkak industri pun penatai kuasa ulih dikena baru enggau semikonduktor di Sarawak.
Ukai semina nya, ku Premier Sarawak, pengawa nyain sempekat pemereti ati (MoU) Sarawak Microelectronics (SMD) Semiconductor enggau kompeni ari UK, CSA Catapult siti ari pemujur ke ditempa maya program nemuai nya.
"Penatai kitai ditu (UK) dikena kitai nyerungkai pengulih ngemansangka teknologi baru, ambika banding baka di Leeds kitai udah diterangka enggau teknologi pemadu baru bekaul kuasa ulih dikena baru iya nya biojisim.
"Kitai mega udah nemuai ngagai Loji Kuasa Drax ti ngasilka kuasa biojisim ari lais kayu alai kitai deka ngena teknologi ke sebaka di Sarawak," ku iya madah.
Nambahka jaku iya, Premier Sarawak madah, semina Drax aja bisi loji kuasa nya di dunya ti ngasilka biojisim.
Bela datai nyempulang program nya sapit iya, Datuk Amar Awang Tengah Ali Hasan, Sekretari Perintah Sarawak, Datuk Amar Mohamad Abu Bakar Marzuki, Sekretari Wang Sarawak, Dato Sri Dr. Wan Lizozman Wan Omar, Sapit Menteri Pengatur Mengeri, Tanah enggau Rampa Menua Sarawak, Datuk Len Talif Salleh, Sapit Sekretari Perintah Sarawak (Pengatur Ekonomi & Pemansang) Datu Dr. Muhammad Abdullah Zaidel, Chairman Opis Pemansang Ekonomi Sarawak (SEDC) Tan Sri Datuk Amar Abdul Aziz Husain, Tuai Pegawai Eksekutif Kumpulan Sarawak Energy, Datuk Sharbini Suhaili enggau Sekretari Mendam Opis Menteri Kuasa enggau Pemeruan Rampa Menua Sarawak , Abang Ahmad Abang Morni.-EDISI UKAS
