Program ERAT EAIC Negapka Integriti & Pengandal Peranak Ngagai Agensi Penerit Atur
Disiarkan pada 10 Nov 2024
Sumber Berita: UKAS
KOTA SAMARAHAN: Pengasi atur ke dipejalai agensi penerit atur nyadi kunchi besai dikena nentuka pemansang ba kandang menua pesisir ulih dipejalai enggau integriti lalu nadai sebarang salah guna kuasa.
Sapit Menteri Pemansang Genturung Pendiau enggau Wilayah, Datuk Rubiah madah, pengandal rayat menua pesisir ngagai inisiatif perintah deka teguh agi pengudah sida meda pengeransing enggau pengasi atur ari agensi bekaul.
Ku iya, sida deka muntang agi nerima sereta meri sukung ngagai projek pemansang ti dipejalai.
Kaban Parlimen Kota Samarahan madah munyi nya maya bejadika Program Encouraging Responsibility Accountability Trustworthiness (ERAT) di Balai Gerempung Peladang Kota Samarahan ditu, kena Hari Enam tu tadi.
Nerang enggau silik, Datuk Rubiah madah, program ke diatur Komiti Besai Integriti Penerit Atur (EAIC) tu mai pesan ti beguna bekaul enggau integriti, akauntabiliti enggau pengandal ngagai raban penerit atur, nembiak sereta mensia mayuh.
Ku iya, inisiatif baka tu ukai semina bisi pengulih ngerapit seraka entara agensi penerit atur enggau rayat, tang meri empas ke besai ngagai komuniti genturung pendiau.
“Komunikasyen ke manah entara agensi penerit atur enggau peranak genturung pendiau nengah program baka tu meri ruang ngagai mensia mayuh mansutka penemu enggau meretika enggau terang agi bakani tiap pemutus meri empas ngagai pengidup sida iya, “ ku iya madah.
Sama bisi datai ba program tu iya nya Chairman EAIC Tan Sri Dr. Ismail Bakar sereta Residen Sitak Samarahan Mohamad Irwan Bahari Bujang.-EDISI UKAS
