Mensia Mayuh Diperansang Ngulu Pengerembai Bank Digital, Ngemuntang Transaksyen Dagang Temuai
Disiarkan pada 10 Nov 2024
Sumber Berita: UKAS
KABONG: Mensia mayuh diperansang ngambi bagi ba pemansang bank digital sereta nambah penemu bekaul enggau chara ngena teknologi pemadah nengah Program ‘Cashless Society’ ke diatur Bank Simpanan Nasional (BSN).
Sapit Menteri Besai, Dato Sri Fadillah Yusof madah, inisiatif ‘cashless’ ukai pekara baru, tang nya seraris enggau visyen Perintah Sarawak ngubah gaya idup rayat di wilayah tu nuju transaksyen ‘cashless’, seraya nyungkak sosioekonomi lokal.
“Konsep ke diatur raban BSN tu setimpak enggau visyen Perintah Sarawak nengah data ke dipansut Opis Multimedia Sarawak ba taun 2022, ke alai lebih 590,290 mensia mayuh berejister lalu 85,445 orang dagang ba selampur nengeri ngerikod transaksyen penyampau RM 1.8 bilion kenyau dilanchar ba taun 2017,” ku iya madah.
Iya madah munyi nya maya bejadika pengerami ngelanchar program nya sereta Program Sejahtera Komuniti MADANI (SejaTi MADANI) ti seraris ari sekeda agensi perintah enggau Opis Pelilih ditu, kena Hari Enam tu tadi.
Nerang enggau silik, Dato Sri Fadillah madah, Kabong tebilang enggau sektor Dagang Mikro, Mit enggau Jelan Pemesai (PMKS), lebih agi bekaul enggau asil tasik enggau pemakai asal, ngembuan pengulih ke tinggi dikena ngemansang nyadi sebuah mengeri dagang temuai di Sarawak.
Ku iya, menua tu dikenadal ulih meri mayuh penguntung ekonomi ngagai peranak menua nya, kelimpah ari nya mega ulih nambah penatai pemisi rayat dia.
Berebak enggau nya, iya meransang peranak menua dia ulih ngena sistem ‘cashless’ dikena ngemuntang pengawa transaksyen bala temuai.
Ku iya agi, pemanah sistem ‘cashless’ tu dikeandal ulih ngeranchakka agi pengawa dagang temuai di pelilih nya. -EDISI UKAS
