POZNAN: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau raban perintah nengeri mujur datai di Poznan, Poland beserimbai program nemuai bejalaika pengawa perintah dua hari di menua nya.
Penatai iya disempulang Sapit Premier Sarawak Datuk Amar Awang Tengah Ali Hasan enggau Sekretari Perintah Sarawak Datuk Amar Mohamad Abu Bakar Marzuki.
Maya nya deligit perintah Sarawak nya disambut Sapit Presiden Wilayah Wielkopolska, Marek Gola enggau Direktor Opis Ekonomi Kandang Wilayah Wielkopolska, Beata Joana.
Bela datai iya nya Tuai Bagi Wielkopolska 2050, Magdalena Kaseja-Astriab enggau Duta Besai Malaysia ke Poland, Dato' Chitra Devi Ramiah sereta Sekretari Mendam Opis Menteri Kuasa enggau Pemeruan Rampa Menua Sarawak, Abang Ahmad Abang Morni.
Di Poland, Premier Sarawak deka ngulu Forum Teknologi Hidrogen Eropah Tengah enggau Forum Dekarbonisasi Eropah Tengah ti deka diatur belabuh ari 24 nyentuk 25 April tu.
Iya deka ngenataika jaku maya nya alai iya mega nyadi raban panel forum 'Debate Regions for the Planet' bekaul penemu enggau pengawa Sarawak ngemeranka kuasa, pengelikun kuasa ulih dikena baru, bekaul karbon enggau pemeruan rampa menua.-EDISI UKAS
