ABU DHABI: Sarawak deka ngaga pelin kuing pemansang gas hidrogen lalu mai nengeri tu datai ba makit dagang kuasa beresi ba reggat global.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, siti ari pekara dikemerat ba pelin tu iya nya bekaul bekal hidrogen.
Ku iya, pengawa ngasilka hidrogen patut dijual enggau rega ke jelan ngambika semua ulih ngena kuasa gadung nya.
"Kedua iya nya bekaul peminta. Reti iya teknologi sel kereban api meseti mansang lalu tu deka numbuhka peminta ba perengka pengangkut alai hidrogen tu deka diguna ba perengka pengangkut," ku iya nerang.
Iya bejaku munyi nya maya randau khas begulai enggau Ukas enggau TVS sepengudah nyadi panel ba randau beserimbai Program Pemandang enggau Konferens Petroleum Antarabansa Abu Dhabi (ADIPEC) 2024 ba Palan Program Pemandang Nasional Abu Dhabi (ADNEC) ditu, Hari Tiga.
Dulu ari nya maya nyadi panel program randau bekaul 'Pengawa Asia Nentu Kuing Makit Dagang Hidrogen', Premier Sarawak madah, pengawa mansik deka digaga ngena teknologi pemadu baru ngambika ungkus ngasilka gas hidrogren ulih dikurangka.
Ku iya, kuasa gadung nya digagaka nyadi kereban api alternatif ba tuju napi isu napi ubah klimet ke majak nyadi.
Taja pia iya madah, ungkus ke besai kelimpah mayuh kuasa dikena nukar kereban mata nyadi hydrogen bela nyadi penguji ba pengawa kuasa ngalih.
Ba pekara nya, iya madahka Sarawak bekenaka pengeraja asal ke endang bisi ba kuasa ulih dikena baru nyadi pengawa ngasilka hydrogen.
"Kitai udah bisi kuasa ulih dikena baru manggai 5 gigawatt lalu ngarapka ba taun 2030 penyampau nya nambah ngagai 10 gigawatt," ku iya nerang.
Bela datai maya nya Sapit Premier Sarawak Datuk Amar Awang Tengah Ali Hasan, Menteri Utiliti enggau Telekomunikesyen Dato Sri Julaihi Narawi, Sekretari Perintah Sarawak Datuk Amar Mohamad Abu Bakar Marzuki, Sapit Menteri Kuasa enggau Pemeruan Rampa Menua Datuk Dr Hazland Abang Hipni, Sapit Menteri Pengatur Mengeri, Tanah enggau Rampa Menua Datuk Len Talif Salleh, Chairman SEB Datuk Ibrahim Baki sereta bala pegawai perintah nengeri ke bukai.-EDISI UKAS
