ABU DHABI: Perintah Sarawak diarika Sarawak Energy Berhad (SEB), Abu Dhabi Future Energy Company (PSJC) Masdar enggau Gentari, siti kompeni kuasa beresi udah nyain Sempekat Pengawa Mansik Begulai Trilateral Malaysia ba tuju nyerungkai pengulih ngaga projek solah melepu di Tekat Ai Murum.
Nengah kerejasama strategik nya, pengawa mansik deka dipejalaika dalam kendang 12 bulan ngaga projek ke dipelaba ulih ngasilka kuasa solar manggai 1 gigawatt (GW).
Pengawa nanggam sempekat nya diatur di Mengeri Masdar, Abu Dhabi, kena Hari Dua tu tadi, alai SEB diarika Tuai Pegawai Eksekutif (CEO), Datuk Sharbini Suhaili lalu Masdar enggau Gentari bela diarika CEO sida, Mohamed Jameel Al Ramahi enggau Sushil Purohit.
Pengawa nya dikemataka Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg, Sapit Premier Sarawak Datuk Amar Awang Tengah Ali Hasan, Menteri Utiliti enggau Telekomunikesyen Dato Sri Julaihi Narawi, Sekretari Perintah Sarawak Datuk Amar Mohamad Abu Bakar Marzuki, Sapit Menteri Kuasa enggau Pemeruan Rampa Menua Datuk Dr Hazland Abang Hipni enggau Chairman SEB Datuk Ibrahim Baki.
Maya aum media, Datuk Patinggi Abang Zohari madah, projek besai nya ila disadang ulih nambahka agi pemayuh kuasa ulih dikena baru di Sarawak.
"Tu begunaka belanja ke besai tang nambahka agi asil kuasa ulih dikena baru ngagai nengeri Sarawak.
"Ukai semina nya, nyangka kerejasama tu ngerandang jalai ngagai kitai numbuhka mayuh agi projek ke bukai nengah kerejasama ekonomi Abu Dhabi enggau Sarawak," pia ku iya.
Nambahka jaku iya, Premier Sarawak madah, nyema projek nya mujur, Sarawak deka nyadi menua keterubah di dunya ulih mansutka kuasa manggai 1GW ari solar melepu.
Ku iya, projek nya bela deka ngemujurka juluk ati Sarawak mansutka 10 GW kuasa manggai taun 2030.
"Ari pemujur tu kitai mega ulih bekunsika kuasa nya ngagai menua sepiak-sepiak tauka 'interconnection exercise' nyadi Asian Grid," ku iya madah baru.
Ba aum media nya, Datuk Sharbini mega madahka SEB udah nyain Sempekat Pemereti Ati (MoU) enggau Masdar ngaga projek nya maya Konferens Ubah Klimet Pertubuhan Bangsa-Bangsa Bersatu (COP28) di Dubai ba taun 2023 suba.
Iya ngarapka udah 12 bulan pengawa pansik dipejalai, projek nya ulih digaga lalu ngepunka kuasa solar disambung ngagai grid.
"Kitai udah nentuka endur ngaga solar melepu, empat iti endur ke bendar iya.
"Kitai ulih ngasilka 600 megawatt nyentuk 1,000 megawatt kuasa solar," ku iya nerang.
Dulu ari nya, Premier Sarawak enggau deligit Perintah Sarawak dibai nemuai ngagai Mengeri Masdar, mengeri likun karbon enggau hab teknologi tebilang di Abu Dhabi.
Bela bisi maya nya, Chairman Petroleum Sarawak Berhad (PETROS) Tan Sri Datuk Amar Hamid Bugo, Chairman Opis Pemansang Ekonomi Sarawak (SEDC) Tan Sri Datuk Amar (Dr) Abdul Aziz Dato Husain enggau bala pegawai perintah nengeri ke bukai. - EDISI UKAS
