ABU DHABI: Perintah Sarawak merambu deka ngaga siti opis di Abu Dhabi, Emiriah Arab Bersatu (UAE) ba tuju deka ngenegapka agi kerejasama strategik enggau menua nya.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, taja pia, endur muka opis Sarawak nya agi benung diperatika.
Ku iya, nyema pekara nya dipenyadi, opis nya ila deka dipegai Petroleum Sarawak Berhad (PETROS) enggau Sarawak Energy Berhad (SEB).
"Tu mega nyadika chara kitai ngenegapka agi kaul kerejasama enggau menua di Timur Tengah enggau Asean ke bukai bekunsika teknologi enggau Abu Dhabi.
"Abu Dhabi udah nyadi palan data ti digaga nengah kuasa ulih dikena baru ngena solar lalu sida mega bekunsika pekara nya enggau pemeranak puku.
"Nyangka kitai berati pengulih begulai enggau Timur Tengah lalu kitai bela melaba ba renggat Asean deka nempa siti kerejasama rat Timur Tenggah enggau kitai di Asia," ku iya madah.
Iya nerangka pekara nya ba aum media udah ke nemuai ngagai Mengeri Masdar, Abu Dhabi beserimbai program nemuai gawa ngagai UAE, Hari Dua tu tadi.
Bela bisi datai Sapit Premier Sarawak Datuk Amar Awang Tengah Ali Hasan, Menteri Utiliti enggau Telekomunikesyen Dato Sri Julaihi Narawi, Sekretari Perintah Sarawak Datuk Amar Mohamad Abu Bakar Marzuki, Sapit Menteri Kuasa enggau Pemeruan Rampa Menua Datuk Dr Hazland Abang Hipni, Sapit Menteri Pengatur Mengeri, Tanah enggau Rampa Menua, Datuk Len Talif Salleh enggau Tuai Pegawai Eksekutif (CEO) Kumpulan SEB Datuk Sharbini Suhaili.
Premier Sarawak mega madahka opis Sarawak di Abu Dhabi bela megai tanggungpengawa baka Opis Dagang enggau Dagang Temuai Sarawak-Singapura (STATOS), Opis Dagang enggau Dagang Temuai Sarawak-Brunei (STATOB) enggau Opis Dagang enggau Dagang Temuai Sarawak-Kalimantan. -EDISI UKAS
