Sukung UNIMAS Nyungkak Pengulih Sarawak Nyadi Palan Kuasa Gadung
Disiarkan pada 05 Nov 2024
Sumber Berita: UKAS
KOTA SAMARAHAN: Universiti Malaysia Sarawak (UNIMAS) mengkang nyukung pengawa nyungkak pengulih Sarawak nyadi palan kuasa gadung di Malaysia.
Sapit Premier Sarawak Datuk Amar Douglas Uggah Embas madah, kerejasama strategik enggau UNIMAS lebih agi ba pekara pemansang deka ngamatka juluk ati Sarawak nyadi pemekal besai hidrogen beresi di menua tu.
“Sarawak bisi pengulih nyadi palan kuasa gadung di Malaysia lebih agi hidrogen enggau kuasa ke ulih dikena baru enggau ke bukai baka hidro, solar lalu empai lama bisi kuasa baru ditemu ulih dikemansangka iya nya bekaul tasik.
“Enggau sukung UNIMAS ba pengawa mansik kuasa gadung, kitai andal ulih nyaup ngamatka juluk ati Sarawak nyadi pemekal hidrogen beresi di Malaysia,” ku iya madah maya bejadi Pengerami Konvokesyen UNIMAS Ke-28 ditu, Hari Dua.
Kelimpah ari nya, iya ke mega Pro-Canselor UNIMAS madah, perintah Sarawak meda autonomi pelajar nyadi siti singkang ke beguna dikena meri pelajar pemadu manah ngagai anak Sarawak.
Nambahka jaku iya, Datuk Amar Douglas Uggah madah, autonomi penuh ba pekara pelajar deka meri awak dikena ngelangkar program ke lebih relevan nempa modal mensia kelas keterubah.
“Ba pekara tu, tanggungpengawa UNIMAS amat berat lalu aku chukup muji pengeransing universiti tu ba pengawa nyendiaka program pelajar ti ulih besemekih ngagai semua nyengkaum sida ke kurang benasib manah mega,” ku iya madah.
Sama bisi datai maya nya Mandal Canselor UNIMAS, Profesor Dr Ahmad Hata Rasit sereta bala temuai dipebasa ke bukai. -EDISI UKAS
