SINGAPURA: Food And Hotel Asia (FHA)-Food & Beverage (F&B) 2024 iya nya siti program pemandang dagang B2b pemadu besai Singapura udah berengkah diatur di Max Atria Singapore Expo, Hari Dua.
Tu mungkur 65,000 meter persegi pemesai kandang endur program enggau 70 pavilion antarabansa diatur empat hari berunggu belabuh 23 ngagai 26 april tu ti digulu 1,500 penyereta ari 50 buah menua selampur dunya nyengkaum ari Sarawak.
Sapit Menteri Dagang Antarabansa Enggau Pemeranak Puku Sarawak, Datuk Malcom Mussen Lamoh bisi datai dipebasa bejadika Sarawak Pavilion ke diatur Opis Dagang Temuai enggau Dagang Sarawak, Singapura (STATOS).
Datuk Malcom maya nangkan nya madah, program nya nyadi siti pelasar mandangka produk ari Sarawak ti tau bendar matak mensia mayuh ke bisi datai.
"Sarawak udah ngambi bagi ba program tu ketiga kali, lalu tu endang dipeda tau bendar meri awak endur kitai mandangka penyelai produk pemakai enggau ai irup kitai.
"Aku ngasaika Pavillion Sarawak tu deka majak tebilang dudi hari.
"Tang ke beguna iya nya kitai ulih datai ba makit antarabansa," ku iya maya dirandau Unit Komunikasi Awam Sarawak (UKAS) nangkan nya.
Dulu ari nya, Tuai Pegawai Eksekutif STATOS, Chew Chang Guan madah, ba pengeransing mai Sarawak nyulut ba dagang betanam betupi, Pavillion Sarawak taun tu bisi 32 iku penyereta ti ngarika orang dagang tebilang di Sarawak mandangka produk dagang sida ngagai tikas antarabansa.
"Tuju kami ukai semina mai bala mayuh tang mega deka meda penuduk Sarawak datai ba makit global," ku iya maya bejaku ba Pengerami Bejadi Sarawak Pavilion.
Bela datai maya nya Sapit Sekretari Mendam Opis Menteri Dagang Antarabansa, Industri enggau Pemeranak Puku Lo Sheau Sia sereta bala bukai. -EDISI UKAS
