Penyerakup & Integrasi Ramu Besai Nyapai Penegap Ekonomi, Rama & Politik
Disiarkan pada 03 Nov 2024
Sumber Berita: UKAS
ASAJAYA: Kaunsil Pemansang Rama Sarawak (MPS), Opis Menteri Pemansang Indu, Nembiak Mit enggau Pengelantang Komuniti (KPWK) udah ngatur program Randau Solidariti Komuniti (RSK) Sitak Samarahan renggat pelilih Asajaya enggau kerejasama ari Opis Residen Bagi Menua Samarahan sereta agensi perintah di Balai Mayuh Guna Kampung Moyan Laut, Asajaya ditu, kena Hari Enam tu tadi.
Program tu berengkah muak ke lemai enggau program ‘jom senam sihat’ dikenatai ulih Family Fitness Samarahan.
Pengawa pemandang agensi mega bisi diatur ba dalam balai nya nyadi siti inisiatif dikena meri eksposur enggau penerang bekaul enggau tugas sereta penguntung agensi nya ngagai peranak menua pesisir.
Program pengerami nangguh nya udah dipenyadi Sapit Residen Bagi Menua Samarahan Rais Ahmat.
Ku iya, penyerakup enggau integrasi sigi ramu besai dikena nyapai penegap ekonomi, rama enggau politik ba rayat pupu bansa.
“Penyerakup tu enda datai kediri laban nya meseti diterenak lalu ditanam dalam komuniti kenyau agi mit ngambi ulih dikerindu sepemanjai idup.
“Nengah aktiviti solidariti komuniti, kerejasama enggau ejansi sereta seksyen refleksyen pemansang rama ke dipejalai, aku andal bala penyereta ulih ngerinduka pemesai guna kaul manah ngambi kaul ti bekualiti tu ulih diangkat enda ngira laki tauka indu, renggat umur, etnik enggau pengarap,” ku iya madah.
Nya alai, iya meransang ngagai rayat terus nerenak penyerakup enggau solidariti dalam penyelai ngambi ulih ngangkat pengelantang komuniti kelebih agi di Pelilih Asajaya enggau di Sarawak.
Iya mega ngarap program tu ulih ngepunka penyedar sereta meri pengerindu bekaul enggau penyerakup, pemansang rama enggau pengelantang komuniti.
Ba pengerami ke sama, pengawa nyuaka perais ungkup pengawa lumba enggau pekit karaoke diatur tumu pagi.
Sama datai, Pegawai Pelilih Asajaya Jerry Zannuddin Bidin, Temenggong Rayat Melayu Bagi Menua Samarahan Chek Bujang, Penghulu Genturung Pendiau Moyan Laut Gani Awi sereta temuai dipebasa ke bukai. -EDISI UKAS
