PraNgelanchar Pilot Projek Agro Research Lab Inyak Sebuyau Renggat 1
Disiarkan pada 02 Nov 2024
Sumber Berita: UKAS
SEBUYAU: Ejensi Pemansang Wilayah Begulai (IRSDA) udah ngatur pra-ngelanchar Pilot Projek Agro Research Lab Inyak Sebuyau Renggat 1 di Ladang Kelapa Pandan, Kampung Arus Melayu, Sebangan ditu, Hari Enam.
Pengawa pra-ngelanchar nya udah dipenyadi Menteri Utiliti enggau Telekomunikasyen Sarawak ke mega Kaban Kunsil Nengeri (ADUN) Sebuyau, Dato Sri Julaihi Narawi.
Dikena ngepunka pengawa tu ba sitak nya, nyiur udah ditanam sehari tu enggau pemesai 3.4 hektar ke nyadi sebagi ari kandang endur Pilot Projek, Agro Research Inyak Sebuyau (Renggat 1).
Projek tu nyengkaum penerang ke udah dikenataika Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg lalu iya udah ngemendar agih belanja sepenyampau RM35 juta ngagai Komiti Agro Research Lab Inyak Sebuyau dikena bejalaika pengawa ke deka sida.
Kelimpah ari nya, Komiti Agro Research Lab Inyak Sebuyau benung chakah deka ngelala endur bukai ke bisi pengulih dikena ngemansang nyadi endur nanam baru inyak ke ulih mansutka asil tinggi.
Entara Varieti Inyak ke udah dikelala dikena bejalaika projek tu iya nya Inyak Pandan, Tacunan, enggau Matag.
Dato Sri Julaihi mega ngarapka pengawa tu ulih diterus lalu dikereja bebendar ngambika ulih nyapai tagit 2,000 hektar kebun inyak ke udah ditetapka Premier Sarawak.
Sepenyampau 500 paung inyak pandan udah ditanam ba ladang kelapa nya.
Projek tu mega disadang deka mai pemujur ba pengawa mansik sereta ngangkat sektor agro kelebih agi ba pengawa mansut asil inyak ba menua Sebuyau, sereta mantu nyungkak penatai pemisi enggau tikas pengidup peranak menua nya.
Sama datai Prof. Dr. Ahmad Hata Rasit Mandal Canselor, UNIMAS, Pegawai Pelilih Sebuyau, Ayuradiman Bujang, Pegawai Atur Pengawa Khas IRSDA, Anuar Da'an sereta temuai ke bukai. -EDISI UKAS
