3000 Ngulu Pengerami Bejadi Main Bol Tebuka Trofi Datuk Amar Awang Tengah
Disiarkan pada 02 Nov 2024
Sumber Berita: UKAS
LAWAS: Sepenyampau 3,000 udah ngulu ngerichah Pengerami Bejadi Main Bol Tebuka Trofi Datuk Amar Awang Tengah ke diatur ba Stadium Lawas ditu, kena Hari Lima tu tadi.
Pengerami nya mega richah enggau penatai Sapit Premier Sarawak, Datuk Amar Awang Tengah Ali Hasan, ke meri peransang enggau pengeransing ngagai bala penyereta ke deka bepekit.
Datuk Amar Awang Tengah, ke mega Kaban Kunsil Nengeri (ADUN) Bukit Sari lebuh bejaku madah ke iya chukup ngemeratka pengeransing Perintah Sarawak ba pengawa ngiga penau baru ngagai rebak biak ke nyadi singkang beguna dikena ngemansang lumba nengeri tu.
“Kitai deka terus ngiga penau baru ngambika sida ke bisi pengulih ukai semina ulih ngarika nengeri sida, tang ulih ngarika menua ba pekit ke besai agi ungkup dudi hari ila,” ku iya.
Iya mega meri pengaga ati ngagai Kaban Komiti (AJK) ke udah bebendar gawa dikena nentuka pemujur atur pekit taun tu.
Kelimpah ari nya, iya mega madah, perengkaguna lumba di Lawas deka dikemanah agi dikena nyukung mayuh agi program lumba ungkup pemaik komuniti enggau pemansang atlit menua.
Pekit tu diatur berengkah ari 1 ngagai 3 November tu mega richah enggau mayuh bengkah program baka chabut tikit benasip, ke alai perais ke chukup ngerinduka ati nyengkaum motosikal bisi disedia ngagai bala temuai.
Sama bisi datai ba pengerami nya Kaban Parlimen Lawas, Dato Henry Sum Agong, Sekretari Politik Premier Sarawak, Awangku Jinal Abedin Dato Pengiran Jawa, Pegawai Pelilih Lawas, Ladin Atok, Direktor NRDA, Dato Ubaidillah Abdul Latif, enggau Tuai Raban Biak PBB Pampang Bukit Sari, Tali Basir. – EDISI UKAS
