Makit Sungai Merah Digaga Baru
Disiarkan pada 01 Nov 2024
Sumber Berita: UKAS
SIBU: Makit Sungai Merah ke baru deka dibuka lalu semua pedaja di Sungai Merah disadang mindah ngagai begunan baru nya bulan tu.
Sapit Menteri Pengerai Mensia Mayuh, Pengawa Berumah enggau Perintah Menua, Datuk Michael Tiang Ming Tee madah, Pengerami Bejadi Makit Sungai Merah ke udah digaga baru nya disadang diatur bulan Disember tu ila.
“Kami deka ngangau Premier Sarawak bejadika begunan baru Makit Sungai Merah nya ke disadang diatur bulan Disember tu,” ku iya madah ngagai media sepengudah nemuai ngagai Makit Sungai Merah nya kena Hari Empat tu tadi.
Iya ke mega Kaban Kunsil Nengeri (ADUN) Pelawan madahka Makit Sungai Merah ke digaga baru nya deka nyungkak ekonomi menua lebih agi di menua Sungai Merah empu.
Ku iya madah, pedagang enggau mensia mayuh deka ngasai pengelantang penembu begunan baru Makit Sungai Merah nya.
“Begunan baru tu mai pengelantang ngagai mensia mayuh. Ditu mega bisi galeri sejarag dikena ngenang sejarah Makit Sungai Merah ke lama,” ku iya madah.
Maya nya mega, Sapit Menteri ba Opis Premier Sarawak (Integriti enggau Ombudsman) Dato’ Murshid Diraja Dr. Juanda Jaya ke bela bisi datai maya nya madah, Makit Sungai Merah ke baru nya digaga enggau chukup moden ti ngemeranka pemeresi.
Sama bisi datai, Residen Sitak Sibu Abang Mohamad Porkan Abang Budiman, Pengari Direktor Unit Integriti enggau Ombudsman Sarawak Wan Hipni Wan Mohamad sereta Pemangku Pegawai Pelilih Sibu Cynthia Ong Hshiang Ping. - EDISI UKAS
