Pengerami WAK Nyungkak Pemansang Industri Kreatif Di Sarawak
Disiarkan pada 01 Nov 2024
Sumber Berita: UKAS
KUCHING: Pengerami ‘What About Kuching’ (WAK) majak tebilang ninting taun ukai semina mandangka pemansang seni enggau daya idup di Sarawak tang nyadi siti ari pemun nyaup nyungkak dagang temuai sereta negap industri kreatif di nengeri tu.
Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, Pengerami WAK nyadi pelasar dikena mantai macham bansa seni, daya idup sereta gaya pengidup Sarawak ngagai mensia mayuh sereta temuai antarabansa.
“Pengerami tu nyadi elemen ke beguna ba kalender program Sarawak sereta nyaup ngelakuka dagang temuai enggau ngerembaika agi industri kreatif kitai.
“Aku ngarapka pengerami tu majak mansang agi nengah macham program betikas dunya ba taun dudi ila,” ku iya madah maya Pengerami Makai Lemai Terima Kasih Pengerami WAK 2024 di Balai Mahligai ditu, kena Hari Empat tu tadi.
Iya mega madah, opis menteri iya meri sukung ke tegut ngagai Pengerami WAK, lalu inisiatif tu disukung mayuh bengkah agensi perintah sereta bakih kunsi sektor peribit.
“Aku meri terima kasih ngagai semua raban ke udah nyukung Pengerami WAK tu ti nyadi siti kelai ke besai reti ngagai dagang temuai, raban nembiak enggau industri kreatif di Sarawak,” ku iya madah baru.
Sama bisi datai iya nya Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan sereta temuai dipebasa ke bukai. -EDISI UKAS
