KMKK, JKKK Dipinta Ngeripot Projek Laun Tembu
Disiarkan pada 01 Nov 2024
Sumber Berita: UKAS
SIBU: Tuai Komuniti enggau Tuai Raban Bansa Genturung Pendiau (KMKK) sereta Komiti Pemansang enggau Pengelikun Genturung Pendiau (JKKK) dipinta ngeripot sebarang pengawa ke enda nitih atur tauka projek laun tembu dipejalai ba kandang menua sida.
Sapit Menteri Pengerai Mensia Mayuh, Pengawa Berumah enggau Perintah Menua, Datuk Michael Tiang Ming Tee madah, tu beguna endar dikena nentuka pemansang ke patut sereta lurus kelimpah ari pengawa ke engkeman ke ulih diambi.
“Pangku pengawa KMKK enggau JKKK mantau projek pemansang di kandang menua sida iya beguna endar. Sida patut nentuka tiap projek ke benung dipejalai nitih spesifikasyen ke udah ditetapka , nadai sebarang penimpang,” ku iya madah.
Iya madah munyi nya maya Pengerami Bejadika Jelajah Integriti Siri 16 Bil 7/2024 Pelilih Sibu DUN Pelawan di Starlink Hotel ditu, kena Hari Empat tu tadi.
Ku Datuk Michael Tiang madah, KMKK enggau JKKK nyadi mata enggau pending perintah dikena beratika isu rama ke ulih ngerusak integriti mensia mayuh, baka pengawa penyalah enggau penyalah dadah.
Tu ku iya, integriti ukai semina bekaul nengah sukut ekonomi enggau pemansang tang mega ngaul pengelantang enggau pengelikun mensia mayuh.
“Nyadi Sapit Menteri, aku seruran deka nyukung program ti ulih nerenakka integriti, lebih agi ngagai raban nembiak, orang dagang enggau atlit negeri kitai, ngambika Sarawak ulih nyapai lebih integriti enggau progresif
“Kitai begunaka kerejasama ke rat agi ba semua raban dikena nentuka integriti seruran dijaga ba pengawa ngemujurka misyen nempa Sarawak nyadi sebuah nengeri pemadu kaya enggau mansang di Malaysia, lalu KMKK patut nyadi chunto ke manah ngagai mensia mayuh,” ku iya madah baru.
Seraris engau visyen Sarawak nyadi nengeri ke mansang manggai taun 2030, nambah ke jaku iya, Datuk Michael Tiang madah, perintah nengeri nengah Unit Integriti enggau Ombudsman Sarawak (UNIONS), Opis Premier Sarawak deka terus ransing agi ngemeranka daya idup ke integriti.
Sama bisi datai iya nya Sapit Menteri di Opis Premier Sarawak (Integriti enggau Ombudsman) Dato’ Murshid Diraja Dr. Juanda Jaya, Residen Sitak Sibu Abang Mohamad Porkan Abang Budiman, Pengari Direktor Unit Integriti enggau Ombudsman Sarawak sereta Pemangku Pegawai Pelilih Sibu Cynthia Ong Hshiang Ping. - EDISI UKAS
