KUCHING: Rumah sembiang ke minta agih belanja ari Unit Pekara Pengarap Bukai (UNIFOR) Sarawak ditangkan ngambi ngenataika peminta sida nitihka pematut tauka penyampau ungkus ke bendar dikena ngaga projek.
Sapit Premier Sarawak Datuk Amar Douglas Uggah Embas madah, peminta ti kelalu mayuh ke dikena ngaga projek ngadu tauka ngaga rumah sembiayang sida enda patut nyadi.
"Penemu tu enda patut dikembuan ketegal ngira UNIFOR mayuh belanja," ku iya terang madah maya pengawa nyuaka geran ke diatur ba opis iya ditu, Hari Dua.
Ba pengawa nya iya nyuaka chek RM14.335 juta ungkup 32 iti projek ke digaga ba 20 sitak Kunsil Nengeri (DUN) ba selampur Sarawak.
Sekeda ari pengari penerima ke bisi datai maya nya, Menteri Pemansang Raban Indu, Nembiak Mit enggau Pengelantang Komuniti Dato Sri Fatimah Abdullah, Sapit Menteri Pengangkut Sarawak, Datuk Dr Jerip Susil, Sapit Menteri Dagang Temuai, Industri Kreatif enggau Seni Pemerindang Sarawak Datuk Snowdan Lawan enggau Datuk Sebastian Ting Chiew Yew, Kaban Kunsil Nengeri (ADUN) Pakan Tan Sri William Mawan Ikom, ADUN Opar Billy Sujang, ADUN Kota Sentosa Yap Yau Sin enggau ADUN Bukit Semuja John Ilus.
Nambahka jaku iya, Datuk Amar Douglas Uggah madah, bisi mega isu minta agih belanja kelalu besai ambika banding baka minta RM2 juta tang dipinta nyentuk RM6 juta nyadi.
"Bisi mega nyadi sida ke semina urung 200 iku aja raban tang ngelanggur deka ngaga gerija tauka kuil ngena belanja bejuta ringgit," ku iya madah baru.
Iya ke mega Menteri Infrastruktur enggau Pemansang Penyangkai Kapal Sarawak madah, pengari rayat bela tau nyaup ngaduka pansik sereta nentuka belanja ke dipinta nya nitihka pematut.
Ku iya, kelimpah ari nya, sida tau nerangka peminta nya ngagai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk nyema bisi datai ke menua sida.
"Ukai semina nya, pegawai kami bela deka nentuka peminta nya endang nitihka pematut," pia ku iya. -EDISI UKAS
