KUCHING: Randau Petroleum Sarawak Berhad (PETROS) nyadi agregator tunggal ba pengawa nyadung gas di nengeri tu begulai enggau Petroliam National Berhad (PETRONAS) diatu udah tembu diatur.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, timpuh tiga bulan diberi Perintah Sarawak ngagai PETRONAS udah tembu sehari tu, 31 Oktober 2024, alai ku iya, PETRONAS udah ngenataika pekara nya ngagai Menteri Utiliti dan Telekomunikesyen Sarawak, Dato Sri Julaihi Narawi.

"Pengawa nya udah tembu diadu lalu kitai deka ngaduka pengawa nyadi aggregator alai chara enggau prinsip deka dirandau nangkan tu ila.

"Sida (PETRONAS) udah madahka pekara nya ngagai Dato Sri Julaihi. Surat deka diberi ngagai kitai nangkan tu," ku iya madah.

Iya bejaku munyi nya maya dirandau media maya ngabang Deepavali ngagai Presiden Gerempung Tukung Sikh Sarawak Dato Dr Kalwinder Singh Khaira ditu, Hari Empat.

Bekaul pengawa Ngumpul, Nguna enggau Nyimpan Karbon (CCUS) di Sarawak, iya madahka Perintah Besai deka bejuraikan undang-undang baru di Parlimen bulan Disember tu ngambika seriris enggau undang-undang ke udah dipejurai Sarawak.

"Nama ke patut iya nya undang-undang kitai seriris enggau sida, meda nama guna undang-undang nya ba sida.

"Reti ku aku iya nya enti karbon deka dianjung ke Sarawak, meseti meraka menua ti begunaka atur ari sida tang enti udah datai ke Sarawak, nya endang enggi kitai," ku iya nerang.

Nangkan dia, Datuk Patinggi Abang Zohari mega ngabang ngagai pengerami Deepavali Shankar R.P Asnani ba The King’s Curry.

Bela nyempulang iya maya nya Sapit Premier Sarawak Datuk Amar Douglas Uggah Embas enggau Datuk Amar Profesor Dr Sim Kui Hian, Dato Sri Julaihi Narawi, Kaban Kunsil Nengeri (ADUN) Satok Dato Ibrahim Baki, Datuk Bandar Dewan Bandaraya Kuching Selatan (MBKS) Dato Wee Hong Seng sereta pengabang ke bukai. -EDISI UKAS