Sarawak Negap Kuasa Ulih Dikena Baru Nengah Teknologi Nukar Kuasa Angat
Disiarkan pada 29 Oct 2024
Sumber Berita: UKAS
KUCHING: Sarawak benung chakah ngemansangka kuasa ke ulih dikena baru sereta nyerungkai teknologi Nukar Kuasa Pengangat Tasik (OTEC), laban nya siti ari teknologi pemadu baru dikena meresa tikas penangat tasik dikena ngasilka kuasa beresi.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, penuduk geografi Sarawak meri penyelai ba pengawa tukuh kuasa ke ulih dikena baru kelebih agi endur tropika nengeri tu sereta polisi kontinen ke chukup pabu enggau landai.
“Tu garis entara menua ba pemansang kuasa ke ulih dikena baru ukai semina kuasa kinektik ti ngasil ari gelumbang tasik, tang Nukar Kuasa Pengangat Tasik siti bidang ke patut diberatika kitai enggau serius,” ku iya.
Iya madah munyi nya maya ba aum media pengudah ngelancharka Sarawak Sustainability Insights (SSI) 2024 ditu, Hari Dua.
Iya madah baru, nyema inovasyen nya mujur Sarawak ulih ngasil lebih kuasa gadung ke bisi pengulih dikunsi enggau bakih ASEAN tauka dieksport ngagai rantau bukai.
Ku iya, Perintah Sarawak udah berengkah enggau pengawa mansik pengulih ngagai OTEC, lalu pengawa tu disadang ngambi timpuh urung setengah taun.
“Kitai nyangka deka bejalaika pengawa mansik ba luar kandang tasik Miri laban ddalam tasik ke besai agi.
“Penalam tasik beguna endar laban enda ulih kelalu dalam ngambi teknologi tu ulih dipejalai enggau efektif agi,” ku iya.
Ba pengawa nya, Datuk Patinggi Abang Zohari mega udah ngelala 10 Tiang Stategik ti ngembuan tuju nyungkak Sarawak nuju dudi hari ke meruan agi.
Lalu tu nyengkaum Idar Kuasa, Betanam Betupi ke Meruan enggau Pengelikun Pemakai, Mobiliti Gadung, Ekonomi Lingkaran, Pengeluar ke Meruan, Luyang Meruan enggau Tanggungpengawa, Nyaga enggau Penambah Aset Rampa Menua, Mengeri Meruan, Pemansang Komuniti enggau Eko-Dagang Temuai.
Inisiatif tu seraris enggau Juluk Pemansang Meruan (SDG) Gerempung Bansa Bersatu (PBB) ke nyendiaka langkar kereja global ungkup strategik pemansang Sarawak ba mayuh macham sektor.
Sama bisi datai iya nya Sapit Premier Sarawak, Datuk Amar Profesor Dr Sim Kui Hian, Speaker Kunsil Nengeri Sarawak, Tan Sri Datuk Amar Mohamad Asfia Awang Nasar, Menteri Pengangkut Sarawak, Dato Sri Lee Kim Shin, Sapit Menteri Pemansang Infrastruktur enggau Penyangkai Kapal, Datuk Ir Aidel Lariwoo, enggau Sapit Menteri Kuasa enggau Pemeruan Rampa Menua, Datuk Dr Hazland Abang Hipni, Sapit Sekretari Perintah Sarawak (Perambu enggau Pemansang Ekonomi), Dato Sri Dr Muhammad Abdullah Zaidel, Sekretari Mendam Opis Menteri Kuasa enggau Pemeruan Rampa Menua, Datu Abang Ahmad Abang Morni sereta temuai dipebasa ke bukai. -EDISI UKAS
