Tasik Sarawak Ulih Nyadi Taba Nyimpan Karbon & Pengeraja Asal Bukai
Disiarkan pada 29 Oct 2024
Sumber Berita: UKAS
KUCHING: Kandang tasik Sarawak bisi pengulih nyadi taba nyimpan karbon enggau pengeraja asal bukai ke berega.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, udah datai ba maya pengawa mansik dasar tasik ke ulih nyadi taba endur nyimpan karbon.
“Dikena ngatur endur nyimpan karbon enggau manah, kitai meseti meresa dasar tasik kitai enggau betul sereta mansik endur iya, kelebih agi begunaka teknologi pemadu baru.
“Ba pekara tu, aku minta Opis Tanah enggau Survei (JTS) bekerejasama enggau Universiti teknologi Malaysia (UITM) ke alai kitai ari Perintah Sarawak udah ngungkupka belanja RM5 juta ngagai universiti nya, tuju pengawa mansik sereta ngerintis ari raban surveyer dikena meresa dasar tasik nya,” ku iya.
Iya madah munyi nya maya Pengerami Makai Lemai Ngintu Genap Taun Ke-20 Opis Tanah enggau Survey Sarawak ditu, kena Hari Satu tu tadi.
Iya mega madah, pengelandik dikemansang nengah inisiatif tu disadang ulih bejalaika tanggungpengawa ke beguna endar ba projek pemeruan rampa menua di Sarawak lalu rantau tu betuah laban udah dikelala nyadi kandang endur ke nitihka peminta dikena nyimpan karbon enggau efektif agi.
Nerang bekaul enggau sektor betanam betupi mega, Datuk Patinggi Abang Zohari ngemeratka pemesai guna ubah polisi, kelebih agi bekaul enggau sawit.
“Mayuh teda ke ulih nyadika pengawa ekonomi nyengkaum pemansut sum enggau pemansut palet kayu ke ulih nyadi pun penatai biojisim dikena kitai ngasilka kuasa,” ku iya nambah baru.
Ku iya, ungkup tuju nya sepenyampau RM5 juta udah diungkupka ngagai pemansik begulai enggau Ta Ann Holdings Berhad enggau tambah RM5 juta kelebih agi ngagai Universiti Teknologi Swinburne Sarawak.
Ba pengerami ke sama, Premier Sarawak udah madahka pemendar sebidang tanah ungkup Opis Penyukat Tanah Sarawak beserimbai ngintu genap taun sida iya ke-20.
Sama bisi datai iya nya Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh, Sekretari Mendam Opis Menteri Pengeraja Asal enggau Pemansang Mengeri, Datu Abdullah Julaihi, Chairman Opis Tanah enggau Survey Sarawak, Awang Zamhari Awang Mahmood, Presiden GerempungTanah enggau Survey Belisin Sarawak (ALCS), Datu Sr Sudarsono Osman, Minijar Besai Opis Pemansang enggau Pengintu Tanah (LCDA), Datu Sr Zaidi Mahdi sereta temuai dipebasa ke bukai. -EDISI UKAS
