LONDON: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg betuaika deligit perintah nengeri nemuai ngagai loji kuasa Drax di Yorkshire Utara, England, Hari Satu tu tadi.
Bela nyempulang Premier Sarawak nemuai ngagai loji kuasa ke ngena lais kayu ngasilka kuasa 3.9 gigawatts nya, sapit iya, Datuk Amar Awang Tengah Ali Hasan, Sekretari Perintah Sarawak Datuk Amar Mohamad Abu Bakar Marzuki, Sekretari Wang Sarawak, Dato Sri Dr. Wan Lizozman Wan Omar enggau bala pemesai nengeri ke bukai.
Maya dirandau nangkan nya Datuk Patinggi Abang Zohari madah, Perintah Sarawak deka berunding nguna teda biojisim digagaka nyadi kuasa ti efisien.
"Kitai udah datai sereta meda mayuh pekara baru ke ulih dipelajar kitai lalu tadi ba aum penerang enggau program nemuai kitai, dia sida ngasilka lebih kurang 3.9 gigawatts alai sida ngena lais kayu ke diimport ari Kanada enggau Amerika Syarikat.
"Ungkus iya nyangka besai tang kitai nemu teknologi ngena teda biojisim digagaka nyadi kuasa lalu udah pulai tu ila, kitai deka beratika pekara tu," ku iya madah.
Kelimpah ari nya Premier Sarawak madah, perintah nengeri mega meda pengulih ngaga teda biojisim ngena lais kayu nyadi kuasa ulih dikena baru.
"Enti kitai bisi loji kuasa ke baru sereta efisyen, Sarawak mega ulih ngasilka kuasa ulih dikena baru ari teda ke bisi, tang aku meda kitai ulih ngasilka kuasa teda biojisim digagaka nyadi kuasa," ku iya madah baru.
Premier Sarawak mega dipadahka deka bejaku ba Gempuru Besai Artificial Intelligence (AI) enggau Semikonduktor di Dewan Rakyat, Parlimen UK, Hari Dua.
Kelimpah ari nya, iya dipadahka bela deka datai ngemata pengawa nyain enggau besilih sempekat pemereti ati (MoU) antara SMD Semiconductor enggau kompeni ari UK, CSA Catapult.
Premier Sarawak enggau deligit Perintah Sarawak nangkan nya deka ke Poland ngulu Forum Teknologi Hidrogen enggau Program ‘Debate Regions For The Planet’. -EDISI UKAS
