BETONG: Orang bekebun lada di Betong deka ngasaika pemansang ba pekara penatai pemisi sida ari projek nyungkak industri lada tauka ‘Pepper Scale Up Project’ ke benung digaga ba rumah panjai di Penyulok, Layar ditu.
Kaban Parlimen Betong Dr Richard Rapu madah, projek nya nyengkaum ngaga Palan Ngerangkai Lada Putih Solar ke udah tembu digaga.
Ku iya, palan nya disikap enggau perengkaguna ngena teknologi moden.
Maya dirandau udah ke ngabas palan nya empai lama tu tadi, Dr Richard madah, program ke digaga Universiti Sains Malaysia (USM) nya bela disaup TERAJU Wilayah Sarawak ti ngembuan tuju deka nyaup nyungkak ekonomi orang bekebun lada ba rumah panjai Penyulok.
"Orang bekebun lada mega deka diajar dulu ngena teknologi nya lalu ulih ngaga lada putih betikas tinggi nitihka Manufacturing Practise (GMP) enggau Good Agriculture Practice (GAP) lalu seriris enggau tikas ke udah diletak ngambika muntang agi dijual," ku iya madah.
Maya nya mega, Tuai Rumah Kelimbang Jaman ngarika sida semenua ngenataika jaku terima kasih ngagai perintah ke udah mai program nya ngagai rumah panjai sida.
Iya mega ngarapka palan ngerangkai lada nya ulih dikena maya musim ngarang lada urung bulan Jun tu ila. -EDISI UKAS
