525 Penyereta Nerima Penguntung Ari Program MyLesen Di Beluru
Disiarkan pada 27 Oct 2024
Sumber Berita: UKAS
MARUDI: Sepenyampau 525 iku penyereta ari menua Beluru ditu nerima penguntung ari Program MyLesen ungkup lisin motosikal B2 ke udah meri rega ke murah agi enti dibanding ba rega makit selama.
Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Dr Penguang Manggil madah, program MyLesen tu dipejalai dikena mantu sida ke kurang pemisi ngulihka lisin motosikal tu nitihka rega selama di makit.
Iya nerang, lisin diulih ba program diatur enggau mayar rega pemadu murah iya nya RM250 aja enti dibanding enggau rega ba makit RM655.
Iya madah munyi nya maya bejaku ba Pengerami Nutup Program Bantu Lisin Deriba MyLesen B2 renggat Sitak Kunsil Nengeri (DUN) Marudi ditu, kena Hari Enam tu tadi.
Kaban Kunsil Nengeri (ADUN) Marudi nya ngingatka bala penyereta ke udah mujur bulih lisin sida sehari nya semampai ngasika atur enggau undang-undang ba jalai alun, kelimpah semampai deriba bejimat.
Sama bisi datai, Direktor Opis Pengangkut Darat (JPJ) Nengeri Sarawak Norizan Jili, Pegawai Pelilih Beluru Charles Aloysius Lisu, Tuai Polis Pelilih Marudi DSP Nor Aizan Mohd Jamil, Tuai Pampang JPJ Miri Fifi Suhesty Asmuni sereta bala Tuai Komuniti enggau Tuai Raban Bansa (KMKK) Genturung Pendiau. -EDISI UKAS
