KOTA PADAWAN: Sepenyampau RM624,000 udah diberi ngagai lima buah gerija di sitak DUN Mambong rambau Pengawa Nyuaka Chek Unit Pekara Pengarap Bukai (UNIFOR) ke diatur ba Begunan Gerempung Jong Clan, Kota Padawan, kena Hari Enam tu tadi.
Pengawa nya udah dipenyadika Sapit Menteri Pengangkut Sarawak (Langit enggau Darat) ke mega ADUN Mambong, Datuk Dr, Jerip Susil.
Lebuh bejaku, Datuk Dr. Jerip nyemetak madah ke Perintah Sarawak betuai ke Premier Sarawak bejalaika pengawa ke nyelai sereta pengibuh ngagai pemansang rumah sembiang ukai Islam nengah pengawa numbuhka UNIFOR.
Ku iya, unit khas tu mandangka pengeransing perintah nengeri ngagai pengelantang entara jalai pengarap sereta pemansang begulai ngagai semua mensia mayuh.
Ku iya, lima buah gerija ke nerima bantu ari UNIFOR iya nya Gerija St. Luke Evangelist di Kampung Petag, St. Andrew Chapel di Kampung Biya Kamas, Gerija St. Isidore di Kampung Bangau, Gerija St. Clare di Kampung Bara’an Payang enggau Gerija St. Murumba di Kampung Timurang.
Iya madah baru, agih belanja nya diberi ungkup bemacham tuju baka nirika gerija baru, ngaga menara locheng, ngaga balai, pengawa nyeleti perabung sereta nyendiaka perengka guna gerija.
Pengawa ke diatur Opis Palan Servis N19 Mambong digulu urung 80 iku sereta mandangka pengeransing Perintah sarawak meri sukung ngagai pemansang institusyen pengarap ungkup komuniti ukai Islam. -EDISI UKAS
