Inisiatif SCHB Nagit 100,000 Raban Orang Tuai
Disiarkan pada 27 Oct 2024
Sumber Berita: UKAS
KOTA SAMARAHAN: Opis Menteri Pemansang Indu Ruang Bilik, Nembiak Mit enggau Pengelantang Komuniti (KPWK) nengah Opis Pengintu Pengelantang Komuniti Sarawak (JKMS) nagit 100,000 iku ungkup inisiatif Senior Citizen Health Benefit (SCHB) manggai ujung taun tu.
Menteri KPWK, Dato Sri Fatimah Abdullah madah, perengka guna tu disedia ba klinik panel ke udah dichiri JKMS sereta beoperasyen di Sarawak.
“Nengah inisiatif SCHB, raban orang tuai ke ngembuan penatai pemisi ruang bilik RM7,000 ke baru sebulan bisi hak nerima bantu perubat pesakit luar nadai ngena mata duit di klinik panel enggau tatak maksimum RM500 siku setaun.
“Entara penteba ke ulih nerima SCHB iya nya peranak Malaysia ke megai tingki status ‘K’ sereta beumur 60 taun enggau tuai agi,” ku iya.
Iya madah munyi nya maya bejadika pengawa Ngintu Hari Orang Tuai Sedunya Renggat Bagi Menua Samarahan 2024 enggau sulu jaku ‘'Penuaan Bermaruah: Memperkukuh Sistem Penjagaan dan Sokongan Warga Emas' di Balai Mayuh Guna Serakup Peladang Nengeri Sarawak (PPNS), Kota Samarahan ditu, kena Hari Enam tu tadi.
Ngenang pekara bekaul raban orang tuai di Sarawak, iya madah raban sida ngena orang luar nyadi pelasar dikena nyediaka guna dikena nempa mengeri mesra raban orang tuai ungkup raban lunggar umur, raban orang tuai sereta Orang Nyelai Pendiau (OKU) sebedau taun 2028.
Iya nerang, tiga buah universiti ditu udah dichiri nyadi komiti Konsortium dikena bejalaika pengawa mansik profil raban orang tuai ba timpuh semilan bulan dikena nyikap pengawa Perintah Sarawak maya napi status nengeri tuai ba taun 2028.
Ba pengerami nya mega bisi pengawa nyuaka Anugerah Tokoh Raban Tuai ungkup kategori lelaki udah disua ngagai Chek Bujang ari Asajaya seraya anugerah ke sebaka ungkup kategori indu diempu Nasiban Habibulah Khan ari Sadong Jaya ke disua Dato Sri Fatimah.
Sama datai, Temenggong Komuniti Melayu Bagi Menua Samarahan Che Bujang, Pegawai Pengerai Sitak Samarahan Dr Azizah Azahar, Direktor Opis Pengintu Pengelantang Komuniti Sarawak Semawi Mohammad enggau Pakar Penyanding Penemu Perubat Ruang Bilik ke mega Chairman Pengatur Pengawa IDOP 2024 Dr Sally Suriani Ahip. -EDISI UKAS
