PETRONAS Bakih Kunsi Sarawak Nyapai Aspirasyen Ekonomi Kurang Karbon
Disiarkan pada 26 Oct 2024
Sumber Berita: UKAS
KUCHING: Petroliam Nasional Berhad (PETRONAS) deka seruran meri bantu besai ngagai Sarawak dikena ngamatka aspirasyen ekonomi baruh karbon di nengeri tu.
Menijar Besai Kanan, Komunikasyen Strategik, Gerup Kaul Strategik & Komunikasyen PETRONAS Siti Azlina Abdul Latif madah, dikena nangkup tuju nyadi bakih kuasa enggau chara mutar penanggul ti progresif, PETRONAS ngemeratka kerejasama ti dalam agi sereta meruan bepelasarka juluk ati ke sama enggau sukung ari pemereti ati, bebasa sereta pengandal enggau pangan diri.
“Beratika pemujur diatu ba bidang kuasa ke beresi agi, kami mega udah bekerejasama dikena ngamatka aspirasyen Sarawak ngagai ekonomi ke kurang karbon.
“Kerejasama sereta bekunsi enggau Sarawak nyangka bulih mayuh agi pengerembai media,” ku iya madah nengah teks jaku dibacha Minijar Besai Komunikasyen Media Kaul Strategik Gerup enggau Komunikasyen PETRONAS Jalina Joheng ba Malam Aspisiasyen Media Sarawak ke diatur PETRONAS ba sebuah hotel tebilang ditu, kena Hari Lima tu tadi.
Siti Azlina madah, Media Sarawak chukup besai jasa ngagai PETRONAS ngelama tu ke alai iya udah mayuh mantu pengawa bekomunikasyen enggau pemegai saham.
Ku iya nerang, nya udah ngangkat pengulih PETRONAS, lalu seruran nempa penegap jenama sereta ngiga peluang merambu penumbuh sereta pemansang ke manah agi di menua tu tauka ba selampur dunya.
“Nya alai, kami ransing deka nyukung semua inisiatif nyengkaum Anugerah Media Kenyalang 2024 dudi hari, ke ulih meri inspirasyen ngagai bidang nengah chara netapka standard ke tinggi agi ungkup pemanah dalam pengawa media enggau aspirasyen ke besai agi ari pekara ke udah dijapai nengah ripot berita ke meri pangka,” ku iya.
Ba malam nya, bela disua Anugerah Basa Media ngagai semua organisasyen media bepalan di Sarawak nyadi kelai pengaga ati ari raban PETRONAS.
Sama bisi datai, Mandal Presiden Kaul Strategik & Komunikasyen Gerup PETRONAS Nooruddin Abdullah, Chairman Gerup Media Sarawak (SMG) Dato Norhyati Mohd Ismail, Tuai Pegawai Eksekutif (CEO) New Sarawak Tribune enggau Suara Sarawak Dato Jeniri Amir, Tuai Pegawai Eksekutif (CEO) TVS Kushairi Abang, Presiden Gerempung Media Sarawak (FSJA) Ronnie Teo, Minijar Besai Kanan (Strategi & Servis Korporat) Pengatur Projek & Teknologi PETRONAS Abang Jimmy Abang Mordian, Minijar Besai Kanan (Sarawak) Aset Sarawak PETRONAS Noriani @ Yati Mohamad sereta raban media. -EDISI UKAS
