Inovasyen & Integriti Servis Perintah Kunchi Pemujur Sarawak
Disiarkan pada 26 Oct 2024
Sumber Berita: UKAS
KUCHING: Servis opis perintah ti ngemeratka inovasyen enggau integriti di nengeri tu nyadi kunchi ngagai pemansang Sarawak dikena nyapai visyen 2030 nyadi sebuah nengeri maju, ti disungkak data enggau penemu baru.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, kededua elemen nya ngasuh servis opis perintah di Sarawak terus nyulut ba pengawa meri servis pemadu manah ngagai rayat, lebih agi maya napi bemacham pemar kemaya hari.
Madah ke integriti nyadi pugu ngagai semua penyulut dijapai, iya madah ke elemen nya enggau penemu patut sebela ngambi ulih meri servis bisi kualiti tinggi nentuka polisi perintah ulih dipejalai enggau ngasi.
“Servis perintah di Sarawak ba kategori pemadu tinggi ukai ketegal pengelandik, tang mega ngembuan integriti.
“Tu meh penegap kitai lalu aku andal kitai ulih napi pemar ke besai agi ba dudi hari,” ku iya madah.
Iya madah munyi nya maya bejadika Pengerami Nyuaka Anugerah Konvensyen Inovasyen Servis Opis Perintah Sarawak (SCSICA) 2024 di Hotel Pullman ditu, kena Hari Lima tu tadi.
Berebak enggau nya, iya mega bekunsi ke Sarawak diatu ba jalai ti tegap dikena nyapai juluk pemansang nengah pengawa bejalaika Strategi Pemansang Pengudah COVID-19 (PCDS) 2030.
SCSICA tu batang pengawa dalam Ngintu Bulan Inovasyen Servis Opis Perintah Sarawak, ti tampak agi dikumbai SCSIMon, belabuh ari 25 September 2024 enggau rambai jaku ‘Penyulut Meri Servis Belalauka Integriti enggau Inovasyen’.
Anugerah taun tu bisi 12 kategori ti mandangka pengawa inovasyen nyulut ari 50 Tim Inovatif enggau Kreatif (KIK) ke mujur renggat kepenudi ba pengawa besai nya.
Sama datai ba pengerami nya Sapit Premier Sarawak Datuk Amar Prof Dr Sim Kui Hian, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Menteri Industri Pemakai, Komoditi enggau Pemansang Menua Sarawak Dato Sri Dr Stephen Rundi Utom, Sekretari Perintah Sarawak Datuk Amar Mohamad Abu Bakar Marzuki, Sapit Sekretari Perintah Sarawak (Operasyen) Datu Hii Chang Kee, Sekretari Perintah Besai Sarawak Dato Ahmad Nadzri Mohd Hassan enggau temuai dipebasa ke bukai. -EDISI UKAS
