Kongres Speaker Parlimen & DUN Se-Malaysia Di Sarawak Nempa Pemujur Besai
Disiarkan pada 26 Oct 2024
Sumber Berita: UKAS
KUCHING: Kongres Speaker Parlimen enggau Kunsil Nengeri (DUN) Se-Malaysia ke diatur di Sarawak bulan September nyin tadi udah nempa siti pemujur ke besai.
Speaker DUN Sarawak, Tan Sri Datuk Amar Mohamad Asfia Awang Nassar madah, kelimpah ari pengawa bekunsi penemu enggau bejurai ti beguna ngagai sistem sereta penuduk speakar DUN tauka di parlimen, kongres sekali tu mega ngenang enggau silik agi bekaul enggau tusun program ke ulih narit ati.
Ku iya nerang, pekara tu mai bida enggau ngasuh nyadika kongres ke diatur di Sarawak ba taun tu nyadi siti peneleba ngagai sida ke baru ngaul diri.
“Aku udah ngulu ba sekeda kongres nya ba berapa bengkah nengeri, lalu aku andal madahka Kongres Speaker Parlimen enggau DUN Se-Malaysia ke diatur ba Sarawak kena bulan September tu tadi pemadu richah sereta besai,” ku iya madah.
Iya madah munyi nya maya bejaku ba Pengerami Ngenang Jasa Staf Kongres Speaker Parlimen enggau DUN Se-Malaysia 2024 di sebuah hotel ditu, kena Hari Lima tu tadi.
Sama bisi ngulu ba pengerami nya Yang di-Pertua Dewan Negara Dato Awang Bemee Awang Ali Basah.
Ngelansa bekaul enggau tentatif ke udah ditusun sepemanjai kongres nya diatur, iya madah entara bida ke dibai sekali tu iya nya pengerami makai lemai seraya mudik Sungai Sarawak, nemuai ke Muzium Budaya Borneo sereta ke bukai agi.
Berindik enggau pemujur tu, iya enda ngenggai engka DUN Sarawak deka ngaul diri ba pengawa ngatur program ke besai agi ba renggat antarabansa.
“Tu ukai kali kepenudi DUN Sarawak deka diperansang ngambi bagi ke alai bisi peluang kitai deka ngaul ba program betikas nasional enggau antarabansa.
“Nyadi, kitai patut nyikap diri maya pengawa tu datai seraya kitai patut mega nyediaka diri ari sukut nyambut temuai, protokol enggau ke bukai agi,” ku iya madah baru.
Sama datai, Tuai Ombudsman Sarawak Dato Sri Abdul Ghafur Shariff, Sekretari Dewan Negara Sujairi Abdullah enggau Sekretari DUN Sarawak Nur Azhar Bujang. -EDISI UKAS
