KUCHING: Sarawak sekali agi nyadi tuai rumah ngatur pekit betikas antarabansa enggau ngatur Pekit Dunya Tenis Junior J300 (J1) berebutka Trofi Premier Sarawak Ke-40 kena 22 nyentuk 28 April tu.
Menteri Nembiak, Lumba Enggau Pemansang Orang Dagang Sarawak, Dato Sri Abdul Karim Rahman Hamzah madah, dulu ari tu iya nya ari 15 March nyentuk 20 April tu tadi, Serakup Lawn Tenis Sarawak (SLTA) udah ngatur empat pekit betikas antarabansa.
Ku iya, entara pekit nya baka Pekit ITF World Team Junior U14 ke digulu 28 menua, diikuti dientudika Pekit Kepenudi ITF Asia Biak ari 14 taun ke alai 22 menua udah ngambi bagi.
"Pekit Dunya Tenis Junior tu entara pekit betikas dunya ti ulih ngangkatka nama Sarawak nyadi pun pengatur ba renggat Asia Tenggara
“Bisi 200 iku pemain ari 38 buah menua luar enggau ngulu pekit tu nyengkaum pengari ari Australia, Belgium, Bulgaria, Kanada, China, Rusia enggau menua ke bukai ti deka besemekih ba SLTA ditu,’ ku iya.
Iya bejaku munyi nya rambau aum pemberita pengudah pengawa nyuaka Trofi Pekit Tenis Junior Siri J300 (J1) Trofi Premier Sarawak Ke-40 di Kuching kena Hari Satu.
Menteri Dagang Temuai, Industri Kreatif enggau Seni Pemerindang nya madah baru, Serakup Tenis Antarabansa (ITF) enggau Serakup Tennis Asia (ATF) udah meri geran sepenyampau Rm600,000 ngagai SLTA kelai sukung ngagai pekit sekali tu.
Berebak enggau nya, iya ngarapka kerejasama tu ulih mandangka pengeransing SLTA ba main tenis enggau sektor dagang temuai di Sarawak.
Sama bela datai, Presiden SLTA Dato Patrick Liew, Sekretari Mendam Opis Nembiak, Lumba enggau Pemansang Orang Dagang Sarawak (MYSED) Morshidi Fredrick, Tuai Pegawai Eksekutif Gerempung Sukan Sarawak (SSC) Awang Putrayusrie Awang Redzuan sereta raban Sekretari SLTA. –EDISI UKAS
